Облыста – кадрлық өзгерістер
Аймақ басшысы Ерлан ҚОШАНОВ Қарағанды облыстық мәслихаты сессиясында өзінің екі жаңа орынбасарын таныстырды. Облыс әкімінің орынбасары қызметіне Алмас АЙДАРОВ тағайындалды.
– Басқа қызметке ауысуына байланысты менің орынбасарым Марғұлан Кәрібеков лауазымынан босатылды. ҚР Президенті Әкімшілігінің келісімімен облыс әкімінің инвестиция, өндіріс, шағын және орта бизнесті дамыту салаларына жетекшілік ететін орынбасары қызметіне Алмас Айдарұлы Айдаров тағайындалды, – деді Ерлан Қошанов.
Алмас Айдаров әл-Фараби атындағы Қазақ Ұлттық университетін, Қазақстан Республикасы Президенті жанындағы Мемлекеттік басқару академиясын бітірген. Лондон экономика университетінде тәжірибеден өткен. Мамандығы бойынша – экономист, мемлекеттік және жергілікті басқару магистрі.
Сонымен қатар, Қарағанды облысы әкімінің орынбасары қызметіне Серік ШАЙДАРОВ тағайындалды.
– Сіздер, барлықтарыңыз оны жақсы білесіздер. Серік Жаманқұлұлы 20 жылдан астам уақыт бойы – мемлекеттік қызметте. Жаңаарқа, Нұра аудандарын, Жезқазған қаласын, Қарағанды облысының табиғи ресурстарды басқару және табиғатты пайдалануды реттеу басқарамасын басқарған. 2014 жылдан бастап Абай ауданының әкімі қызметін атқарып келді, – деді Ерлан Қошанов.
Ол агроөнеркәсіп кешенін дамыту, қоршаған ортаны қорғау және табиғатты пайдалану мәселелеріне қатысты жұмыстарға жетекшілік ететін болады.
Облыс әкімінің баспасөз қызметі.
