Достықты дәріптеген дода
7 қарашада Қарағанды облысының білім басқармасына қарасты «Мұрагер» мамандандырылған мектеп-лицей-интернатында ата-аналар арасында «Достық» спартакиадасы өтті. Білім мен тәрбиені қатар өрістеткен білім ордасында бұл жолы ата-аналар спорт алаңында бас қосты. Сынып намысын қорғаған 18 команда волейбол, шахмат және теннис түрлерінен бақ сынап, ұйымшылдықтың, зияткерлік ұшқырлықтың, спорттық шеберлік пен өзара сыйластықтың жарқын үлгісін көрсетті.
Іс-шараның тағылымды сәттерінің бірі — бірқатар ата-ананың Қарағанды облысы әкімінің орынбасары Әлібек Үсенұлы Әлденейдің атынан берілген Алғыс хаттармен марапатталуы. Бұл құрмет олардың облыс көлеміндегі қоғамдық өмірге белсенді араласуына, отбасы құндылықтарын дәріптеуге, мектеп пен қоғам арасындағы байланысты нығайтуға және жас ұрпақ тәрбиесіне қосқан өнегелі үлесіне көрсетілген ризашылықтың белгісі болды.
Марапаттарды «Мұрагер» мектебінің директоры Сейфулмалик Абзалович салтанатты түрде табыстап, ата-аналардың белсенді азаматтық ұстанымы мен мектеп өміріндегі бастамаларына алғысын білдірді.
Алаңдағы әр доп, шахмат тақтасындағы әр жүріс, шешуші сәттегі әр ұпай — табандылық пен жауапкершіліктің, сенім мен жігердің көрінісі болды. Тартысты кездесулерде жеңіске деген құштарлық пен әділ ойын қағидалары қатар өріліп, қарсыласқа құрмет көрсету мәдениеті айқын сезілді.
Жарыстың ең әсерлі көрінісі — ата-аналарына жанкүйер болған балалардың қуанышы, сынып жетекшілері мен ұстаздардың шынайы қолдауы еді. Балалар өз ата-аналарын күнделікті қамқорлық танытатын жан ретінде ғана емес, командасы үшін жауапкершілік алып, сын сағатта сабыр сақтайтын, жеңіске ұмтылатын, жеңілісті де лайықты қабылдай білетін тұлға ретінде таныды.
Бұл күнгі ең үлкен жетістік жүлделер мен жеңістердің аясынан әлдеқайда кең еді. Әртүрлі сыныптардың ата-аналары жақынырақ танысып, өзара байланысын бекемдеді. Бәсекелестік достыққа ұласып, ортақ қызығушылық жаңа қарым-қатынастарға жол ашты.
Спартакиада қорытындысында қатысушыларға медальдар мен арнайы марапаттар табысталды. Ұйымдастырушылар әр команданың жетістігіне айрықша ілтипат білдіріп, спорттық шеберлігімен қатар, ұйымшылдығын, жеңіске деген жігерін, табандылығын және өзара сыйластығын жоғары бағалады. «Әділ ойын», «Жалынды жеңіс», «Жарқын дебют», «Үздік командалық рух» сынды түрлі номинациялар арқылы қатысушылардың ерекше қырлары дәріптелді. Әр командаға лайықты құрмет көрсетіліп, жылы лебіздер мен қошемет арналды. Осылайша, жарыстың мәні жүлделі орындармен шектелмей, әр қатысушының еңбегін бағалау, достықты нығайту және ортақ қуанышты бөлісу дәстүрімен айшықталды. Спорт алаңындағы бәсекелестік өзара құрметке, ал жеңіске деген ұмтылыс ортақ мерекелік көңіл күйге ұласты.
