ҰБТ: биылғы шекті балл қанша?
Биыл Қазақстанның жоғары оқу орындарына түсу үшін шекті балл өзгеріссіз қалды. Яғни, кемінде 50 балл жинауы қажет. Ал, ұлттық жоғары оқу орындарына түсу үшін кемінде 65 балл алуы шарт.
Десе де, жоғарғы оқу орынына түсу үшін 50-ден астам балл жинау бағыттары бар. Ең жоғары шекті балл – кемінде 75 балл «Құқық» және «Педагогикалық ғылымдар» білім беру бағдарламаларына түсу үшін бекітілген.
Талапкерлер «Денсаулық сақтау және әлеуметтік қамтамасыз ету (медицина)» бағыты бойынша оқуға түсуі үшін ҰБТ-да кемі 70 балл жинауы тиіс. Ал, ұлттық жоғары оқу орындарына «Ауыл шаруашылығы және биоресурстар» және «Ветеринария» мамандығына түскісі келетіндерге кемінде 60 балл жинау қажет.
– Сондай-ақ, талапкерлер әр жоғары оқу орны өзінің шекті балын қоя алатындығын да ескеру керек. Бұл құқық оларға төрт жыл бұрын академиялық еркіндік негізінде берілген еді. Мысалы, 80 балл жинаған талапкер математика мұғалімі мамандығына ұлттық жоо-ға түскісі келеді. Баршаға мәлім, «Педагогикалық ғылымдарға» шекті балл кемінде 75 балл, ал ұлттық оқу орындарына – кемінде 65 балл. Оқушының жинаған ұпайы жетіп тұр. Алайда, таңдалған университетте оқушының оқығысы келген мамандыққа шекті балл 85-тен басталады. Демек, оқушыға шекті балын 80-ге дейін белгілеген университетті іздеу керек. Жоғары оқу орындарының шекті балы жақын арада ҰТО сайтында жарияланады, – деп атап өтті ҚР ҒЖБМ Ұлттық тестілеу орталығының директоры Руслан Емелбаев.
Естеріңізге сала кетсек, «Қазақстан тарихы» және екі бейіндік пән бойынша шекті балл – кемінде 5 балл, ал «Оқу сауаттылығы» және «Математикалық сауаттылық» пәндері бойынша шекті балл – кемінде 3 балл.
Ербол ЕРБОЛАТ,
Ortalyq.kz
