«Тұлпар» сүрінді

Футзалдан ел чемпионатының 40-шы туры өз мәресіне жетті. Келер айдың соңында ел чемпионатының плей-офф кезеңіне жолдама алған сегіз команда анықталмақ. Ал, бұл чемпионатта өнер көрсетіп жатқан қарағандылық «Тұлпар» шағын футбол командасының жағдайы мәз емес. Күні кеше сырт алаңда «Шымкент» клубымен кездескен. Бірінші кездесуде 1:1 есебімен тең түссе, қарымта ойында 3:7 есебімен жеңіліп қалды.

«Тұлпар» соңғы 13 ойынында тұрақты өнер көрсетіп жүрген жоқ. «Ақтөбе», «Атырау», «Semey», «Қайрат» және «Astana» сынды қарсыласына есе жіберген. Ақтаулық «Каспий» командасына қарсы ойынның бірінші матчында 3:0 есебімен жеңгенімен, қарымта кездесуде 3:4 есебімен жеңіліс тапты.

Күні кеше «Шымкент» клубына қарсы өткізген бірінші кездесуде тең есеп тіркеген. Қоржынға түскен бір ұпайға қарап, қарымта кездесуді де өз пайдасына шешеді деген үміт болған-ды. Алайда, жерлестер қарымта кездесуден ұпайсыз оралды.

Енді жерлестер 25-26 сәуірде өз алаңында оралдың «Бәйтерегін» қабылдаса, 16-17 мамырда сырт алаңда талдықорғанның «Жетісуына» қарсы соңғы ойынын өткізеді. Қазіргі таңда «Тұлпардың» еншісінде – 42 ұпай. Әзірге турнир кестесінің VIII сатысында. Одан кейін елордалық «Astana» клубы тұр. Бірақ, оларда ойналмаған әлі екі ойыны бар. Сондықтан, «Тұлпардың» ел чемпионатының плей-офф кезеңіне жолдама алып-алмауы екіталай. Жолдама алу үшін – соңғы төрт ойынды жеңу қажет. Ал, басты қарсылас елордалықтар қалған алты ойынның кемінде екеуінде жеңілсе, келесі кезеңге шығып кету мүмкіндігі туады.

Ербол ЕРБОЛАТ,
«Ortalyq Qazaqstan»