Жастар үшін жарқын мүмкіндік

Қарағанды облысына жұмыс сапарымен келген Мемлекеттік кеңесші Ерлан Қарин Теміртауда – Qarmet металлургиялық комбинатының алаңында Жастар саясаты жөніндегі кеңестің көшпелі отырысын өткізді. Жиынға Қарағанды облысының әкімі Ермағанбет Бөлекпаев, қала және аудан әкімдері, аймақтағы мемлекеттік органдардың басшылары қатысты.

Жиында Мемлекет басшысы Қасым-Жомарт Тоқаевтың Ұлттық Құрылтайдың IV отырысында айқындап берген міндеттерді жүзеге асыру, ішкі саясат саласындағы жұмыстың басым бағыттары, соның ішінде қоғамдық келісімді, этносаралық және дінаралық татулықты нығайту, ономастика, ақпарат және жастар саясаты мәселелері талқыланды.
Кездесудің басты тақырыптарының бірі – жұмысшы мамандарды ынталандыру және жастарды өндірістік салаға тарту мәселелері болды. Бұл Мемлекет басшысының 2025 жылды «Жұмысшы мамандықтар жылы» деп жариялауымен тікелей байланысты. Кеңес мүшелері бұл шешімді дер кезінде қабылданған, болашаққа бағытталған маңызды қадам ретінде бағалады.
Одан бөлек, жастарды қолдау, олардың еңбек нарығындағы бәсекеге қабілеттілігін арттыру және жұмысшы мамандықтарын дамыту мәселелері қаралды.
Qarmet компаниясында өндіріс орны бойынша экскурсия ұйымдастырылып, комбинаттың өндірістік қуаты мен жаңа технологиялық шешімдерді енгізу барысы таныстырылды. Атап айтқанда, жабдықтарды жаңғырту және өңірдегі экологиялық жағдайды жақсарту жөніндегі бастамалар сөз болды.
Ерекше назар аударылған ма­ңызды кезеңдердің бірі – кәсіпорын тарихында алғаш рет өнді­рісте табиғи газды пайдалану. Бұл қадам жұмыстың тиімділігін арттырып, Теміртау қаласының экологиялық жағдайына оң әсерін тигізеді.
Айта кету керек, қазір кәсіпорында 10 мыңнан астам жас маман жұмыс істесе, оның шамамен 30%-ы – жастар. Кеңесте ұсынылған бастамалар жас мамандардың кәсіби өсуіне қолдау көрсетуді және салалық кәсіпкерлік жобаларды дамытуды көздейді.
Одан кейін Мемлекеттік кеңесші өңірдің шығармашылық және ғылыми интеллигенция өкілдерімен кездесу өткізді. Пікір алмасу барысында Ерлан Қарин Ұлттық құрылтайда Президент көтерген әлеуметтік және мәдени-гуманитарлық бастамалар туралы айтты.
Сапар қорытындысы бойынша жастар саясаты және мәдени-гуманитарлық даму бағытында атқарылып жатқан жұмысты жетілдіруге қатысты нақты ұсыныстар әзірленіп, мемлекеттік органдарға тапсырмалар берілді.
Айта кету керек, Қазақстан Республикасы Президенті жанындағы Жастар ісі жөніндегі кеңес – жастар саясаты саласындағы мемлекеттік саясатты дамытуға арналған консультативтік-кеңесші орган. Кеңес құрамында қоғам белсенділері, еріктілер қозғалысының өкілдері, жас ғалымдар, спортшылар, кәсіпкерлер бар.

Салтанат ІЛИЯШ,
«Ortalyq Qazaqstan»

Суретті түсірген Жангелді ӘБДІҒАЛЫМ