Шағын шаруашылық ірі компанияға айналды
Бұқар жырау ауданының Баймырза ауылдық округіндегі «Нұр-СХ» ЖШС негізін 1998 жылы бұрын Бұқар жырау, Абай аудандарының әкімі болған Еркебұлан Нашаров қалаған еді. Кезінде газетімізде ол туралы жазғанбыз да. Кейін Ерекең қайтыс болған соң оның тізгінін ұлы Ержан Нашаров ұстап, шағын шаруашылықты компаниялар тобына айналдырды.
– Біздің компаниялар тобы негізінен егін шаруашылығымен айналысады. Оның құрамында осы Баймырза ауылындағы «Нұр-СХ» ЖШС, «Жаңа жұлдыз» ШҚ, «Баймырза-Агро 2018» ЖШС, Ростов ауылдық округіндегі «Агрохолдинг Береке» ЖШС бар, – дейді осы компаниялар тобының құрылтайшысы Ержан Еркебұланұлы.
Таратып айтар болсақ, 2018 жылы суландырылған жер шаруашылығын дамыту үшін әуелі оған «Жаңа жұлдыз» ШҚ бірігіп, «Баймырза-Агро 2018» ЖШС құру мақсатында оған суландырылған жер бөлініп, оның көлемі 140 гектардан 672 гектарға ұлғайтылды. Алдағы 2026 жылы оны 800 гектарға дейін жеткізу жоспарда бар. Дәнді дақылдар егістігін суару үшін «Нұр-СХ» ЖШС 2023 жылы суару жүйесі құрылып, 252 гектар жерге 2 жаңбырлатқыш машина қойылды. Ал, биыл тағы да осындай 2 стационарлық машинаны лизинг арқылы алуға келісімшарт жасалыныпты. Одан әрі бұл суармалы егістік көлемін 700 гектарға жеткізуді көздейді олар. Компаниялар тобына 2022 жылы 18 мың гектар егістік жерімен, барлық техникалары және қоймаларымен «Агрохолдинг Береке» ЖШС кіріп, бұл серіктестік алқаптарында да суармалы жер шаруашылығын дамытудың мүмкіндіктері мен су көздері баршылық.
Компаниялар тобы осы 2024 жылы суару жүйесінің жобасын жасап, бір бөгенді қалпына келтіріп, сорғы станциясына орын дайындап, жаңбырлатқыш машиналарды қосу үшін 1,7 шақырым су құбырлары мен жерасты кабельдерін тартқан. Енді шаруашылық 70 гектар егістік алқабын айналдыра жаңбырлататын ZIMMATIC машинасын лизингпен алуға келісімшарт жасаған көрінеді. Бұл компаниялар тобында қазірде 147 адам жұмыс істесе, маусымдық шаруалар кезінде тағы да 50 адам қосылады. Егін шаруашылығын заманауи жаңа үлгіде ұйымдастырып отырған компаниялар тобы биылғы жиын-терім науқанында өз егіндерінен жақсы өнім жинады. Мәселен, «Баймырза-Агро 2018» ЖШС дәнді дақылдар егістігінің әр гектарынан 28,1 центнерден «Жаңа жұлдыз» ШҚ 25 центнерден, «Нұр-СХ» ЖШС 19,1 центнерден астық алды.
Ержан ИМАШ,
Бұқар жырау ауданы
Ortalyq.kz
