Қарағандылықтар «Таза Қазақстан» республикалық экоакциясына белсенді қатысып жатыр. Өткен сенбіліктерде олар 5 мың тоннадан астам қоқыс жинады. Мереке күні, 7 мамырда 100-ден астам адам Бұқпа өзенінің аумағын тазартуға кірісті.
![](http://ortalyq.kz/wp-content/uploads/2024/05/6DACEAF2-A1A7-4153-B597-CDFC41A7E600.jpeg)
Қатысушылар қатарында экологиялық қозғалыстың еріктілері, қала жастары және жергілікті атқарушы органдардың өкілдері бар.
Олар бірлесіп өзен арнасының бір бөлігін тазалап, 300 қап қоқыс жинады.
– Бүгін Бұқпа өзенін тазарту бойынша үлкен жұмыс атқарылды, болашақта біз оны жалғастырамыз. Сондай-ақ, бір ай бойы жалғасатын «Таза Қазақстан» акциясы барысында 5000 тоннадан астам қоқыс жиналғанын атап өткім келеді. Сенбілікке қаланың 10 мыңға жуық тұрғыны қатысты, – деді Қазыбек би атындағы аудан әкімінің орынбасары Ринат Қаржасбаев.
Экологиялық еріктілер қозғалысының жетекшісі Рахат Райымбеков қарағандылықтарды су ресурстарына ұқыпты қарауға, өзендер мен су айдындарын ластамауға шақырды.
– Таза су – біздің ортақ байлығымыз, оны қорғау қажет, – дейді Рахат Райымбеков. – Өзендер мен көлдерді таза ұстай отырып, біз адамдардың денсаулығы мен әл-ауқатына қамқорлық жасаймыз. Біздің әрқайсымыз қаланы осындай акцияларға қатысу арқылы қоқыссыз және таза ете аламыз. Қарағанды үшін таза тіршілік нәрі – «Мөлдір бұлақ» құрайық!
Естеріңізге сала кетейік, «Таза Қазақстан» экоакциясының бесінші аптасы «Мөлдір бұлақ» деп аталып, бұлақтарды, өзендер мен көлдердің жағалау аймақтарын тазартуға арналған.
Аида РАХЫМҚҰЛОВА,
Ortalyq.kz