Қыруар қаржы құйылады

    Қысқы Универсиада ойындарының арқасында қазынаға қыруар қаржы құйылмақ. Алматы қаласының әкімі Бауыржан БАЙБЕКТІҢ айтуынша, бүгінге дейінгі құрылыс жұмыстарынан-ақ бюджетке 9,7 млрд. теңге салық түскен.

   Сейсенбідегі Үкімет отырысында шаһар басшысы Универсиададан түсетін кіріс со­ма­сының бірқатарын жария етті.

   Спорттық нысандар құрылысы барысында 30 мың жаңа жұмыс орны ашылған. Соның нәтижесінде, 9,7 млрд. теңге салық төлемдері жиналыпты. Қазіргі таңда жаһан­дық доданың дайындық шараларына 220-дан астам кәсіпорын жұмылдырылуда. Мұнда 5 мыңның шамасында адам еңбек етеді. Жұмысқа тартылғандардың 80 пайызы – жергілікті тұрғындар.

   Табыс көлемі жарыстар басталған сәттен еселене түспек. Алдын ала жасалған есепке сәйкес, Алматыға келген әр турист күніне шамамен 245 АҚШ долларын жұмсайды. Сөйтіп, 5 мың шетелдік қонақ бес күн ішінде шаһардың шағын және орта бизнесіне 2 млрд. теңгеден артық кіріс кіргізеді.

    Бұдан бөлек, «Атлеттер ауылына» ор­наласқан әр құрама 1 млн. еуро жамбаспұл төлейді. Универсиадаға 59 ел қатысатынын ескерсек, бұл – аз қаражат емес.

   Және қаладағы 8 қонақүй лық толады деп күтілуде. Аталған нысандарда халықаралық спорт федерациясының өкілдері орын тебеді.

  Сондай-ақ, Бауыржан Байбек Универсиада кезінде техникалық, санитарлық және экологиялық нормаларға сай емес көліктер қалаға кіргізілмейтіндігін мәлімдеді. Яғни, техникалық ақауы бар, лас және қоршаған ортаға зияны мөлшерден тыс көліктер қа­лаға кіреберіс қақпалардан қайтарылады.

   Қаладағы денсаулық сақтау нысан­дарының материалдық-техникалық базасы айтарлықтай нығайтылған. Бұл мақсатта 25 емхана, 8 стационар, 215 же­дел жәрдем көлігі мен 370 медицина қызметкері арнайы дайындықтан өтті.

    Денсаулығы сыр берген жандар­ға жәрдем беруде тікұшақтар пайдала­нылмақ. Екі аурухана базасында тікұшақ алаңдары тұрғызылды.

    Универсиадаға қатысушыларға 519 көлік қызмет көрсетеді. Қолданыстағы 28 автобус бағдарына қосымша 18 бағдар ашылады. Бұл қоғамдық көліктер Орталық стадион, «Саяхат» автобекеті және Алматы-1 теміржол вокзалынан қатынайды.

    Қаладағы бірнеше базар екі күнге жабылады. Универсиада басталатын – 29 қаңтар және аяқталатын – 8 ақпан күндері 9 ірі базар қызмет көрсетпейді. Мектеп оқушыларына қосымша демалыс беріледі. Нәтижесінде, көшелердегі жүктеме 30 пайызға кеміп, қала қонақтарының еркін жүріп-тұруына қажетті жағдай жасалмақ.

Нұрқанат ҚАНАФИН