Сыни ойлау шеберлері

Астанада 9-11 сынып оқушылары арасында өткен республикалық пікірсайыс турнирінде Қарағандыдағы Н.Нұрмақов атындағы мектеп-лицейі командасы жүлделі орынға ие болды.

Турнирге еліміздің түпкір-түпкірінен өздерінің дағдылары мен таланттарын көрсеткісі келген қазақ, орыс және ағылшын тілдеріндегі лигаларынан 180 жас пікірсайысшы қатысты. Қарағандының №1 Білім-инновация лицейі және Н.Нұрмақов атындағы мектеп-лицейі командалары облыстың намысын қорғады. Пікірталастар жас спикерлер сыни ойлаудың шеберлігін ғана емес, сонымен бірге шындықты іздеуге деген шынайы ұмтылыстарын көрсетті.

Сайыс қорытындысы ағылшын лигасы бойынша І орын – «Nurmakov B» лигасы жеңіп алды. Орыс лигасында ІІІ орынды – «Nurmakov С» лигасы жеңіп алды. Республиканың «Үздік спикер» аталымын Аяжан Олжагелді иеленді.

Турнир жеңімпаздары диплом, кубоктар және оның жетекшілері Алғыс хаттармен марапатталды. Жеңімпаздарды Оқу-ағарту министрі Ғани Бейсембаев арнайы құттықтады.

Сондай-ақ, оқушылар арасында жылдар бойы пікірсайыс қозғалысының дамуына ерекше үлес қосқаны үшін «Балалық шақтың досы» медалімен Ляззат Маликова (БИЛ) және Айдана Тұтқыш (Н.Нұрмақов атындағы ММЛИ) марапатталды.

Аяулым СОВЕТ,
Ortalyq.kz