«АрселорМиттал Теміртау» АҚ Көмір департаменті Костенко атындағы шахтасының командасы ардагерлер арасындағы мини-футбол бойынша республикалық біріншілікте жеңімпаз атанды.
Шымкент қаласында өткен чемпионатқа еліміздің әр аймағынан 20 команда қатысқан. Қарағандылықтар финалда ОҚО командасымен кездесіп, 2:0 есебімен жеңіске жетті.
– Кеншілер арасында бұрыннан қалыптасқан дәстүр бар. Жыл сайын Қарағанды көмір бассейнінің спартакиадасы өтеді. Біздің команданың жеңісі кездейсоқ емес, – деді ҚР еңбек сіңірген бапкері, Костенко атындағы шахтаның ардагерлер командасының жетекшісі Виктор Вовк. – Шахтада спорттық кешен бар, онда жігіттер, тіпті, қазір мұнда жұмыс істемейтіндердің өзі қысы-жазы аптасына үш рет жаттығу мүмкіндігіне ие.
– Біз спортпен айналысу жас талғамайтынын көрсеткіміз келеді. Республикалық біріншілікте ұтып алған басты жүлдеміз – Еуропа чемпионатына жолдама. Біз халықаралық деңгейде Қарағандының даңқын асқақтатамыз, – деді команда капитаны Сергей Маслов.
Еуропа чемпионаты 2018 жылдың күзінде Словенияда өтеді. Команда құрамы бұл жарысқа бару үшін демеушілер қажет екендігін де алға тартады.
Қуаныш АМАНҚҰЛОВ
