«Шахтер» шаң қауып қалды

Футболдан ел чемпионатының соңғы турында қарағандылық «Шахтер» сырт алаңда шымкенттік «Ордабасымен» кездесіп, 3:1 есебімен жеңіліп қалды. Осылайша шымкеттік клуб өз тарихында алғаш рет чемпион атанды.

Алғашқы минуттан-ақ шымкенттік клуб ойынды қарқынмен бастады. Нәтижесінде, 4-ші минутта – Айбар Жақсылықов, 12-ші минутта – Шахбоз Умаров, 27-ші минутта – Артем Беседин «Шахтердің» қақпасына қатарынан үш гол салып үлгерді.

Өкінішке қарай, жерлестер тарапынан тек Темур Чогадзе 47-минутта есеп алшақтығын қысқартты.

Айта кетейік, бүгінгі таңда ел чемпионы атағын 10 команда иеленген. Оның ішінде елордалық «Астана» клубы 7 мәрте жеңімпаз атанған. Павлодардың «Ертіс» және «Ақтөбе» клубы – 5, алматылық «Қайрат», семейлік «Елімай», елордалық «Жеңіс» – 3 мәрте, Қостанайдың «Тобылы» мен Қарағандының «Шахтері» – 2 мәрте, «Тараз» клубы 1 мәрте жеңіс тұғырынан көрінген.

Ал, «Ордабасы» алғаш рет чемпион атанды. Шымкенттік клуб бұған дейін 2017 және 2019 жылдары қола жүлдеге қол жеткізген.

Ербол ЕРБОЛАТ,
Ortalyq.kz