Сарбаздар әскери ант қабылдады
ҚР Қарулы Күштерінің «Астана» өңірлік қолбасшылығы әскерлеріне қарасты 06708 әскери бөлімінде салтанатты түрде Әскери ант қабылдау рәсімі өтті. Салтанатты іс-шараны бөлім командирі полковник Нүркен Жүнісалиев ашып берді. Дәл осы іс-шараның өтуіне жауапты, жас сарбаздар жиынының бастығы подполковник Қуандық Арыстанов бөлім командирі полковник Нүркен Жүнісалиевке ҚР Қарулы Күштерінің қатарында сап түзеген жас сарбаздардың салтанатты түрде Әскери ант қабылдағаны жөнінде баянатын жеткізді.
Салтанатты жиынға «Астана» өңірлік қолбасшылық әскерлері қолбасшылық басқармасының жауынгерлік дайындық бастығы – әскерлер қолбасшысының орынбасары полковник Аслан Китапбаев қатысты.
Әскери ант қабылдау рәсіміне арналған салтанатты жиын соңынан жас сарбаздар өздерінің әскери өмірге бейімделудің алғашқы күндерінде жинақтаған тәжірибелерін көрсетіп, жиналған қонақтарға, ата-аналарға және туған-туыстарына дене шынықтыру дайындығындағы спорттық жаттығу түрлері, жауынгердің қарумен саптық тәсілдері және спорттық қоян-қолтық ұрыс тәсілдерінің қимылдарын іс-жүзінде көрсетті.
Думан ЖҰМАШҰЛЫ,
Приозерск гарнизонының баспасөз хатшысы.
