Саранда психологиялық-педагогикалық түзету кабинеті ашылды
Саран қаласында ерекше білім беру қажеттіліктері бар балаларға арналған № 8 психологиялық-педагогикалық түзету кабинеті ашылды. Ол бір мезгілде 50 балаға шақталған.
Кешенді психологиялық-педагогикалық көмекке БМКК қорытындысы мен ұсынымдары негізінде және ата-аналарының немесе заңды өкілдерінің келісімімен туғаннан бастап 18 жасқа дейінгі балалар жүгіне алады.
Түзету кабинеті № 9 арнайы мектеп-интернаттың ғимаратында орналасқан.
– Бүгінгі күні бізге психофизикалық дамуы бұзылған 15 бала жазылды. Олар жеке жоспарлар мен кестелер бойынша айналысады. Бізде дефектолог, логопед, психолог, сенсорика кабинеті, ритмика, оқу кабинеттері, сондай-ақ әлеуметтік-тұрмыстық бағдарлау бөлмесі бар. Яғни, балалар күнделікті өмірге бейімделе алады және өзбетінше қимыл-қозғалысқа үйренеді. Бұрын ата-аналар оларды Қарағандыға апаратын, онда олар ақылы түрде айналысатын. Біздің орталықта олар барлық қызметтерді тегін ала алады, – деп хабарлады № 8 ППТК басшысы Құралай Құлмағамбетова.
Жаңа орталықта кедергісіз орта құрылды. Пандустар, тактильді жолдар, тұтқалар, ақпараттық тақтайшалар қарастырылған, табалдырықтар жоқ. Мамандар штаты 17 адамнан тұрады, түзету-дамыту сабақтарын ұйымдастыру үшін қажетті жабдықтар бар.
Түзету кабинетіне malahit24.kz порталы арқылы жазылуға болады.
Қағаз түрінде тіркелу үшін № 8 психологиялық-педагогикалық түзету кабинетінің кеңсесіне жүгіну қажет (Саран қ., Жамбыл к-сі, 112).
Аида РАХЫМҚҰЛОВА,
ortalyq.kz
Суреттерді түсірген Жангелді ӘБДІҒАЛЫМ
