Үнем шамнан басталады
Жарық, жылу үнемдегіш шамдардың, құралдардың дәуірі басталды. Табиғи ресурсты үнемдемесе, оның сарқылып қалатынын бағамдаған адамзат үнемге көшті. Сондай мақсатта дүниеге келген жоба – «PROLUX KZ LTD» ЖШС-нің жарық диодты шамның жоғарғы технологиялық, автоматтандырылған өндірісі.
Бұл шамдарды қолдану арқылы 80% электр қуатын үнемдеуге мүмкіндік бар. Жобаның жалпы құны – 350 млн. теңге, жобалық қуаттылығы жылына 24 мың дана. Жобаны жүзеге асыру жарықдиодты шамдар өндірісіне бағытталған. Оларды қолдану электр энергиясын едәуір үнемдеуге, үнемі жарық пайдаланылатын өндірістер өнімінің өзіндік құнын төмендетуге мүмкіндік береді.
Сондай-ақ көшелерді, жолдарды, көпірлерді, темір жол платформаларын, квартал ішін, өндірістік және қойма ғимараттарын, жылыжайларды, кеңселер мен ТКШ жарықтандыруға пайдаланылады. Сонымен қатар, өнім өндірушілердің айтуынша, сынаптан ада мұндай шам экологиялық тұрғыда таза. Демек, адамның денсаулығына залалы жоқ.
Жобаның жаңашылдығы – мұнда әлемдік индустрияның заманауи технологиясы қолданылады. Соның арқасында жарықдиодты шамдар қарапайым шамдарға қарағанда 10 есе артық уақыт қызмет ете алады. Бұл шамдарға қуат 4 есе аз электр жұмсалады.
Қызғалдақ АЙТЖАНОВА