Өндіріс алыбында – заманауи техника
«АрселорМиттал Теміртау» АҚ жаңа заманауи автотехника сатып алуға 60 млн. теңге қаржы жұмсады. Инвестициялық бағдарлама аясында барлық қауіпсіздік талаптарына сай екі бульдозер сатып алынды. Техниканың өнімділігі 20% жоғары деп хабарлайды «АрселорМиттал Теміртау» АҚ баспасөз қызметі. Таратылған мәліметтерге сүйенсек, бульдозерлер бірінші бөлу цехтарында, агломерация және кокс химия өндірісінде технологиялық материалдарды тасымалдау үшін пайдаланылады.
Жаңа автотехника үнемді және қауіпсіз. Сондай-ақ, операторларды қатер төндіретін жайттардан қорғау қарастырылған. Кабинада серіппелі орындық орнатылған көрінеді. Техниканы аса төмен температурада да қолдануға мүмкіндік беретін қосымша жылыту жүйесі де бар.
Александр ПОЛОННИК, «АрселорМиттал Теміртау» АҚ АКБ басшысы:
– «АрселорМиттал Теміртау» АҚ жыл сайын автопаркті жаңартып, еңбек шартын жақсартуға ұмтылады. Челябинск трактор зауытының «Т-170» бульдозерлерінің жетілдірілген моделі дауыстық хабарлауы бар агрегаттар параметрлерін бақылау жүйесімен жарақталған. Бульдозер жүргізушілерінің жұмысы да, техникалық бақылау жүргізулері де жеңілдейді.
Қызғалдақ АЙТЖАНОВА.