Ұлттық ұлан айбарымыз
Бейсенбі күні еліміздің Ұлттық ұланы күніне арналған салтанатты жиын Қарағандыда алғаш рет ұйымдастырылды. Ұлттық гвардияның ең ірі бірлестігі болып танылған «Орталық» аймақтық қолбасшылығының ұжымы кәсіби мерекені лайықты атап өтті.
Салтанатты шараға құқық қорғау органдары, қала жұртшылығы, әскери ардагерлер, Қарағанды гарнизоны әскери бөлімдерінің жеке құрамы, әскери қызметкерлердің отбасылары қатысты.
Кеншілер мәдениет сарайында мұрағаттық фотолар мен көрме ұйымдастырылды. Сондай-ақ, Ұлттық гвардияның және «Орталық» аймақтық қолбасшылығы әскери бөлімдерінің қызметтік-жауынгерлік тарихын баяндайтын кітаптар, журналдар және деректі фильмдер ұсынылды. Ұлттық гвардияның қалыптасып, дамуына үлкен үлес қосқан ардагерлер, сонымен қатар, жоғарғы буынның дәстүрлерін жалғастырушы үздік әскерилерді Қарағанды облысы әкімінің орынбасары Анатолий Шкарупа аймақ басшысы атынан марапаттады.
«Орталық» Өңірлік қолбасшылығының қолбасшысы, генерал-майор Еркін Ботақанов салтанатты шараға қатысушыларды құттықтады. Ширек ғасыр бойы тек алғы шептен көрініп жүрген ішкі әскердің, қазіргі таңдағы ұлттық гвардияның қызметіне тоқталды.
Мерекелік кеште қалалық би ансамбльдері мен вокалдық ұжымдар өнер көрсетті.
Аяулым СОВЕТ