Кезекті жеңіс

    «Үйдегі» үшінші ойында да «Сарыарқа» кезекті жеңісіне қол жеткізді. Бұл жолы қытайлық Цзилинь қаласынан келген «Ценг Тоуды» ұтты. 4:0.

Ойын басынан «Сарыарқа» тізгінді қолға алды. 15-ші минутта Кирилл Тамбиев қытайлық қақпашы Тялоны қапы қалдырды. 1:0.

Екінші кезеңде Александр Юксеев есепті еселеді (32-ші минут). 2:0.

Ал, матчтың үшінші бөлігінде Даниил Ердаков (44-ші минут) пен Дмитрий Желнеровский (53-ші минут) мергендіктерімен көзге түсті. 4:0.

Ойын соңына таман алаңдағы тартыс қыза түсті. Тіпті, «сарыарқалық» қорғаушы Тимур Булатов пен қытайлық қорғаушы Даниил Стальнов бір-біріне жұдырық ала жүгірді. Төбелесқұмарлардың бұл қылығына төзе алмаған төреші екеуін де бес минутқа ойыннан шеттетті.

Қазір «Сарыарқа» турнир кестесінде үздік бестікті түйіндеуде. Қоржында – 85 ұпай бар.

Топ басындағы петерборлық «Динамода» – 103 ұпай. Одан кейін 96 ұпаймен тағы бір петерборлық ұжым «СКА-Нева» орналасқан. Еншісіне 91 ұпай жазған қорғандық «Зауралье» үшінші орынды меншіктесе, Альметьевскінің «Нефтянигі» 87 ұпаймен «Сарыарқадан» бір саты жоғары тұр. Лигадағы тағы бір қазақстандық клуб – өскемендік «Торпедо» 82 ұпаймен алтыншы сатыдан орын тепті.

«Сарыарқа» кеше харбиндік «КРС Хэйлунцзянді» қабылдады. Келесі турда Новокузнецкіге барады. «Металлургпен» өтетін матч 29 қаңтарға белгіленген.

Нұрқанат ҚАНАФИН