КЕМЕЛ КЕЛЕШЕККЕ ДАҢҒЫЛ
Елбасы Нұрсұлтан НАЗАРБАЕВ сыбайлас жемқорлыққа мемлекет пен қоғам біріге отырып, қарсы күресу керектігін әрдайым айтып келеді. «Болашаққа бағдар: рухани жаңғыру» мақаласында Президент ел азаматтарын коррупциямен ымырасыз күреске шақырды.
Бұл мақалада Мемлекет басшысы әлеуетті біртұтас ұлт құру үшін рухани жаңғырудың бағыттарын белгілеп, алдағы жылдардағы міндеттерді айқындап көрсетті.
Бiз бүгінде жаңа қоғамда өмiр сүрудеміз. Елбасымыздың алға қойған басты мақсаттарының бірі – дамыған 30 елдің қатарына қосылу. Осы мақсатқа қол жеткізу үшін әр азамат мемлекетіміздің өсіп-өркендеуіне аянбай адал қызмет етуі тиіс.
Ежелден халқымыз ғасырлар бойы туған жерімізді сақтап, оның байлығын үнемді, әрі орынды пайдалануды ұстанған ел. Ел Тәуелсіздігін жариялаған сәттен Елбасымыз халқымызды осы қағиданы ұстануға шақыруда.
Иә, сыбайлас жемқорлықтың тамыры тереңге тарап, қоғамға кері әсерін тигізетіндігі рас. Бұл ретте, елімізді дамыған елдердің қатарынан көру үшін әр Қазақстанның азаматы бүгінгі күннің басты құндылықтарын – тазалық, адалдық, Отанға, туған жерге деген сүйіспеншілігін арттырып, санасына сіңіруі қажет. Ал, осы құндылықтар әр адамның ой-санасында сақталса, ұрпақтан-ұрпаққа жалғасатыны сөзсіз.
Тарихқа сүйенсек, Қазақстан ТМД елдері арасында алғашқылардың бірі болып «Сыбайлас жемқорлықпен күрес туралы» Заңын қабылдап (1998 ж.), арнайы бағдарламаларды бекітіп, бұл зұлымдықпен күресуге қадам бастады. Алғашқы қабылданған Заңда сыбайлас жемқорлықпен күресуге, салдарын жоюға баса назар берілсе, кейінгі, 2015 жылғы 18 қарашадағы «Сыбайлас жемқорлықтың алдын алу туралы» Заңда сыбайлас жемқорлықты болдырмау, алдын алуды көздейді.
Дегенмен, елiмiзде сыбайлас жемқорлыққа қарсы Заңдар қабылданып, бірқатар жұмыстар атқарылғанымен, жемқорлық мәселесі бүгінгі күннің өзектісіне айналып отыр.
2014 жылдың 26 желтоқсанында Қазақстан Республикасының 2015-2025 жылдарға арналған сыбайлас жемқорлыққа қарсы стратегиясы бекітілді. Бұл құжаттың басты мақсаты мемлекеттің сыбайлас жемқорлыққа қарсы саясатының тиімділігін арттыру, сыбайлас жемқорлықтың кез келген көрінісіне «мүлдем төзбеушілік» қағидасын қалыптастыру және Қазақстанда сыбайлас жемқорлық деңгейін төмендету болып табылады.
Бүгінде облысымызда Стратегияда көзделген міндеттемелерді орындауға бағытталған кешенді іс-шаралар жоспары құрылып, жүзеге асырылуда.
Сыбайлас жемқорлық – әлемді шарпыған індет. Бұл індеттің түп-тамырын жою үшін қоғам болып белсенділік танытуымыз қажет. Ал, қоғам дегеніміз – ол сіз бен біз, яғни, заңға, қоғамдағы өзіміздің міндеттеріміз бен моральдық ахуалымызға деген бір-біріміздің қарым-қатынасымыз. Олай болса, әрбір қазақстандық өзінің ой-санасына сыбайлас жемқорлыққа қарсы қағидасын қалыптастырып, жемқорлыққа жол бермей, мемлекетпен бірігіп жұмыс жүргізсе, нәтижесінде, алға қойған мақсаттарға сүрінбей жететіндігімізге сенімдімін.
Ф.ҚАСЫМОВА,
ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Қарағанды облысы
бойынша департаментінің сыбайлас жемқорлықтың алдын алу басқармасының бас маманы.