Көкбөрі-рух көкке өрлеп
Көрнекті ақын, Абай атындағы Қазақстан Республикасы Мемлекеттік сыйлығының иегері, Қазақстанның еңбек сіңірген қайраткері Серік Ақсұңқарұлы 75 жасқа толып, мерейлі мерейтойын атап өтуде. Ақынды облыс әкімдігінде салтанатты түрде құрметтеп, мерейтой иесін облыс әкімі Ермағанбет Бөлекпаев арнайы құттықтады.
Жиынды ашқан Ермағанбет Қабдулаұлы ақынның ел мәдениеті мен әдебиетіне қосқан ерекше үлесіне кеңінен тоқталып, оның шығармашылығының ұлттық руханияттағы орнын ерекше атап өтті.
– Сіз – көрнекті ақынсыз, құрметті азаматсыз. Дарыныңызбен қазақ әдебиетіне зор үлес қосып келесіз. Сіздің шығармаларыңыз жастайыңыздан жоғары бағаланып, оқырмандардың ыстық ықыласына бөленді. Сіз көп жылдар бойы Қазақстан Жазушылар одағының Қарағанды облыстық филиалын басқардыңыз. Сарыарқаның дарынды ақындарын бір арнаға біріктіру жас жазушыларға үлгі болды. Өлеңі өрісті, ойы кемел, руханияттың нағыз жанашыры Серік Ақсұңқарұлының шығармашылығы халық жүрегінен берік орын алған. Сіздің туындыларыңызда елдің мұңы мен қуанышы, арман-аңсары жатыр, – деді облыс әкімі құттықтау сөзінде.
Сонымен қатар, өңірдің зиялы қауым өкілдері, ақынның әріптестері мен замандастары да ізгі тілектерін білдіріп, Серік Ақсұңқарұлының қазақ әдебиетіндегі айрықша орнын атап өтті.
Өз кезегінде Серік Ақсұңқарұлы жиналған қауымға ризашылығын білдіріп, жүрекжарды лебізін жеткізді:
– Ақын өз халқынсыз өмір сүре алмайды. Мен облысымызда қоғамымыздың өзекті мәселелерін көтеретін дарынды жазушылардың көп екеніне қуаныштымын. Халық мәдениетті жоғары бағалайды. Халқыма менің шығармашылығымды қолдағаны және құрметтегені үшін ризамын! Ақын үшін туған халқының ықыласынан асқан құрмет жоқ. Мен халқымның менің шығармаларыма көрсеткен ықыласы мен қолдауына шын жүректен алғысымды айтамын, – деді ақын.
Серік Ақсұңқарұлы – Ақтоғай ауданы, Қызыларай ауылының тумасы. Ақындық жолын мектеп қабырғасында бастаған ол Қарағанды мемлекеттік университетін тәмамдаған соң облыстық, республикалық басылымдарда еңбек етті. Қазақстан Жазушылар одағының және Абай атындағы халықаралық клубтың мүшесі.
Қаламгердің осы күнге дейін 15 кітабы жарық көріп, үш томдық таңдамалы шығармалар жинағы басылды. Қазіргі таңда жеті томдық толық шығармалар жинағын баспаға дайындау үстінде. Серік Ақсұңқарұлы шығармашылықпен қатар аударма саласында да белсенді еңбек етіп келеді. Ол Александр Пушкин, Анна Ахматова, Марина Цветаева, Евгений Евтушенко, Назым Хикмет сынды әлемдік поэзия алыптарының өлеңдерін қазақ тіліне аударған.
Серік Ақсұңқарұлының өлеңдері де орыс, украин, түрік, қырғыз, әзірбайжан, моңғол және испан тілдеріне аударылып, әлем оқырмандарына танымал болды. Сонымен қатар ақынның жекелеген туындылары әлемнің алты тіліне аударылған қазақ поэзиясының антологиясына енген.
Өзінің ұзақ жылғы шығармашылық еңбегі үшін ақын көптеген мемлекеттік марапаттар мен сыйлықтарға ие болды. Ол – Қарағанды қаласының, Ақтоғай және Қарқаралы аудандарының Құрметті азаматы. Оның есімі бүгінде тек облыс аумағында ғана емес, тұтас ел көлемінде құрметпен аталады.
Ерік НАРЫН,
«Ortalyq Qazaqstan»
Суретті түсірген Александр МАРЧЕНКО
