Инсулин өндіріледі
Қарағандыда инсулин шығарылмақ. Бұл туралы Tengrinews.kz хабарлады.
Үш отандық өндіруші жақын уақытта 19 түрлі инсулин өндірісін жолға қоймақ. «СК-Фармация» холдингі бұл мақсатта «Қарағанды фармацевтика кешені», «Хикма СНГ» және «Элеас» кәсіпорындарымен ұзақмерзімді келісімшарт жасады.
ҚР Денсаулық сақтау министрлігінің мәліметінше, Қазақстанда 300 мың шамасында адам қант диабеті дертіне шалдыққан. Бұл дерек жыл санап арта түсуде.
Қант диабетімен ауыратын жандарды тиісті дәрі-дәрмекпен қамту мақсатында жылына 22 түрлі инсулин шетелден сатып алынады. Үстіміздегі жылы жұмсалған қаржы 6,6 млрд. теңгені еңсерген. Дегенмен, аталған инсулиндер дер кезінде жеткізілмеу фактісі тіркелуде.
Күрмеулі түйінді тарқатуда отандық өндіріс көмекке келмек. Кәсіпорындар алдағы бес жылда толық қуатына шығуы қажет. Қарағандылық кәсіпорында инсулиннің 8 түрі шығарылатын болады.
Өз тілшімізден.