Идеяны іске асыратын орталық
Халықты елімізде жүргізіліп жатқан реформалар туралы кеңінен ақпараттандыру, сондай-ақ, атқарушы билік органдарының халық алдындағы есептілігі мен жауапкершілігін арттыру мақсатында Қазақстан Республикасының Мәдениет және ақпарат вице-министрі Евгений Кочетов Қарағанды облысына жұмыс сапарымен келді. Сапар барысында вице-министр өңір жұртшылығымен кездесіп, ақпараттық саясат, мәдениет саласындағы бастамалар және мемлекеттік реформалардың негізгі бағыттары бойынша түсіндіру жұмыстарын жүргізді.
Евгений Кочетов алдымен Қарағанды «Ортау» креативтік орталығында болып, жас креаторлармен кездесті. Кездесу барысында вице-министр шығармашылық индустрияларды дамыту, жас таланттарды қолдау және мәдениет саласындағы мемлекеттік реформалар туралы ой бөлісті.
– Бүгінгі кездесу креативтік индустрияны дамыту перспективасына қатысты сіздер үшін де, біз үшін де үлкен мүмкіндік. Евгений Кочетов креативті индустрияны дамытуға үлес қосып, осы саладағы мемлекеттік саясаттың қалыптасуына ықпал ететін негізгі тұлғалардың бірі, – деді кездесуге қатысқан облыс әкімінің орынбасары Әлібек Әлденей.
Евгений Дмитриевич кездесу еркін форматта өтетінін және қатысушылар креатив бойынша ғана емес, өздерін толғандырған кез-келген сұрақтарын қоюға болатынын жеткізді.
– Биыл Қазақстан Республикасының Президенті Қасым-Жомарт Тоқаев креативті индустрияларды қолдау және дамыту мәселелері бойынша заңға қол қойды. Бұл заң креативті саланы дамытуға бағытталған институционалдық негіздерді қалыптастыру, инфрақұрылымды дамыту және басым салаларды қолдау шараларын қамтиды. Бұл заңның қабылдануы Қазақстанда креативті индустрияларды дамытуға жаңа серпін беріп, осы саладағы кәсіпкерлер мен шығармашылық тұлғаларға қолдау көрсетуді көздейді, – деді Евгений Кочетов.
Вице-министр қазір аталған заңды толықтыру және жетілдіру мақсатында жұмыстар жүргізіліп жатқанын айтты. Сондықтан, Қарағандыға келген сапарында аталған салаға қатысты айтылатын ұсыныстарды жедел түрде пысықтап, заң жобасына енгізетіндерін де жеткізді.
Вице-министр сондай-ақ, креативті индустрия жаңа Салық кодексіне қатысты ешқандай зардап шекпейтінімен де бөлісті. Яғни, креативті индустрия саласындағы кәсіпкерлер үшін салықтық жеңілдіктер қарастырылған.
– Қазір ел бойынша креативті хабтар ашылуда. Бұл жер ең алдымен креативті кәсіпкерлердің жұмыс істейтін орны. Яғни, біз үшін кретившілер – бизнес. Оның біреуі – актер, біреуі – суретші болуы мүмкін. Солай дегенмен де, ол экономиканың толыққанды саласы. Мемлекеттік институт ретінде шығармашылық дағдыларыңызды, әзірлемелеріңізді коммерциялауға көмектесуіміз керек. Хабтар да сол үшін құрылуда, – деді Евгений Кочетов.
Айтуынша, республика бойынша 12 креативті хаб ашылған. Соның бірі – Қарағанды қаласындағы «Ортау» креативтік орталығы.
Орталық өз жұмысын өзі басқарады, ал, Министрлік болса, тек қаржылай көмек көрсетеді.
– Әлемде мұндай тәжірибе кеңінен таралған. Біздің орталықтар да соның мысалында жұмыс істейді. Бірыңғай оператор инфрақұрылым сияқты ортақ игілікті пайдалана алу мүмкіндігін қарастырады. Тек мүмкіндікті пайдаланып, жұмыс атқарса болды, – дейді вице министр.
«Ортау» – Қарағанды қаласында орналасқан заманауи креативтік орталық, ол жас өнерпаздар мен шығармашылық тұлғаларға өз идеяларын жүзеге асыруға мүмкіндік беретін алаң. Орталық түрлі бағыттағы шеберлік сыныптары, көрмелер мен мәдени іс-шараларды ұйымдастырып, жастардың шығармашылық әлеуетін дамытуға ықпал етеді.
Вице-министр шығармашылық индустрияларды қолдау мемлекеттік саясаттың басым бағыттарының бірі екенін атап өтіп, жас таланттарға өз бастамаларын жүзеге асыруда табыс тіледі.
Креативтік орталықтан кейін Евгений Кочетов облыс орталығындағы «Достық үйінде» тұрғындармен кездесті. Вице-министрдің жұмыс сапары туралы толық ақпарат газеттің келесі номерінде беріледі.
Ерік НАРЫН
