ХҚКО: онлайнда — оңтайлы іс-қимылдар

Карантин жағдайында тиісті қызметін тиянақты атқарып, тұрғындарға сапалы қызмет ұсынып отырған мекемелердің бірі – Халыққа қызмет көрсету орталықтары. Онлайн режимінде оңтайлы жұмыс істеуге жылдам машықтанған білімі мен білігі келісті, тіпті, сол мақсатта арнайы оқудан өткен екі мыңға тарта қызметкер 1414 байланыс орталығының кеңесшілерімен бірге жұмыла жұмыс жасауда. Олар күніне еліміз бойынша шамамен миллионға тарта қоңырау қабылдап, тиісті кеңестер береді екен. Ал, Қарағанды облысы бойынша «Азаматтарға арналған үкімет» мемлекеттік корпорациясына қарасты ХҚКО-ның 60 қызметкері еgov порталында онлайн рәсімделіп, нәтижесі қағаз түрінде берілетін 23 мемлекеттік қызмет бойынша офлайн тәсілімен жұмыс істеуде.

Қазақстандықтар Халыққа қызмет көрсету орталықтары төтенше жағдайға байланысты жабылғаннан бері мемлекеттік қызметтердің 80 пайызын электрондық үкімет арқылы алуда. Одан бөлек, тұрғындар өздеріне қажетті ақпаратты eGov мобильді қосымшасы мен телеграмдағы egovkzbot2.0 ботынан көру мүмкіндігіне иеленген.

Президент Қасым-Жомарт Тоқаевтың тікелей тапсырмасына сәйкес, Халыққа қызмет көрсету орталықтары онлайн режиміне көшіп, әр қалада дайын құжаттарды беретін «Бір терезе» қағидаты басшылыққа алынғалы аталған міндетті атқару жауапкершілігі Қарағанды қаласы бойынша Шахтерлер даңғылы, 5/2 үй мекен-жайында орналасқан ХҚКО-ына жүктелген.

Бұдан бөлек, мамандандырылған ХҚКО-ында да дайын құжаттарды сұраныс иесіне беру терезесі бар. Көліктерін қайта тіркеген, болмаса, жүргізуші куәліктерін онлайн алмастырғандар да көлік номері мен құжаттарын тек осы жерден ғана алады.

Төтенше жағдай кезінде әлеуметтік төлемдер алуға мәселесі бойынша берілетін кеңесті де ХҚКО өз міндетіне алды. Яғни, жұмыста кідірістің орын алмауы әрі халыққа ыңғайлы болуы үшін мемлекеттік органдар өкілдерінен құралған ар найы топтың eGov-та көрсететін қызметтері бойынша кеңес береді. Мәселен, ХҚКО-ы уақыт талабына сай қызметін тоқтатқалы, облыс бойынша жүктілігі және босануына байланысты жәрдемақы алатындардың 500-ден астам өтініші, бала бір жасқа толғанға дейін оның күтіміне төленетін жәрдемақы бойынша 700-ден аса өтініш Халыққа қызмет көрсету орталығы қызметкерлерінің көмегімен, онлайн рәсімделген. Бұрын бұл қызметтер ХҚКО-да ғана көрсетілсе, «Азаматтарға арналған үкімет» мемлекеттік корпорациясы өтініштерді порталдағы «Электронды өтініштер» сервисі арқылы қабылдау мүмкіндігін ұсынды. Бұл egov.kz порталындағы «Отбасы» – «Бала» бөлімінде рәсімделеді.

Ыңғайлылық үшін электронды цифрлық қолтаңбаны да порталда қашықтықтан рәсімдеуге болады. Сондай-ақ, «Мобильді азаматтар» базасында тіркелген жас аналар проактив қызметін пайдаланып, баланың тууын тіркеп, тиісті жәрдемақыны рәсімдеп, сәбиді балабақша кезегіне қоя алады.

Қысқасы, телефонға еш тыным жоқ. «Тұрғындар кеңес алу үшін 1414 байланыс орталығына қоңырау шалғанда, бірден хабарласа алмайтындарының басты себебі – осы» – дейді жауапты қызметкерлер. Олардың айтуынша, төтенше жағдай кезінде бірыңғай байланыс орталығына соғылатын қоңыраулар саны рекордтық көрсеткішке жеткен.

Қызметті онлайн алуға қалыптаспағанына қарамастан, қазіргі уақытта тұрғындар орталық қызметкерлерінің кәсіби кеңесінің арқасында өздеріне қажетті қызметтерді онлайн алуда кедергі мен қиындықты сезіне қоймайтын тәрізді.

Қазір Шахтерлер даңғылы бойындағы Халыққа қызмет көрсету орталығының барлық телефондары онлайн кеңес беруге жұмылдырылған. Бұл өз кезегінде қоңырау шалу кезінде кезек күту уақытын азайтуға мүмкіндік береді.

Салтанат ІЛИЯШ