Бюджет қаражатының жұмсалуы – бақылауда

Қарағанды облысының прокуратурасы мемлекеттік сатып алу туралы заңнаманың бұзылуын анықтады.

Мәселен, «Балқаш қалалық тұрғын үй-коммуналдық шаруашылық, жолаушылар көлігі және автомобиль жолдары бөлімі» ММ-нің лауазымды тұлғалары заң талаптарына қайшы келіп, 625 млн.теңге сомасына су құбырын жобалық-сметалық құжаттамасыз және сараптамалық қорытындысыз күрделі жөндеу жұмыстарын жүргізуге мемлекеттік сатып алу жүргізген. Сонымен қатар, Қарағанды облысының табиғи ресурстар және табиғат пайдалануды реттеу басқармасы ластаушы заттардың шығарындыларының мөлшерін өлшейтін құрал-жабдықтар мен аспаптарды сатып алуды 75,2 млн.теңге сомасына негізсіз жоспарлаған. Қарағанды облысының прокуратурасының мәліметінше қабылданған шаралардың нәтижесінде бюджет қаражаты облыстық бюджетке қайтарылып, қайта бөлуге жіберілген.

Ілияс ДҮНГЕНБАЙҰЛЫ