«АрселорМиттал Теміртаудың» жаңа атауы белгілі болды
Облыс әкімі Ермағанбет Бөлекпаев Теміртауда компания ұжымымен кездесуде Qazaqstan Steel Group акционері Андрей Лаврентьевті таныстырды. Қазақстанда және Қарағанды облысында танымал кәсіпкер «АрселорМиттал Теміртау» активтерін сатып алды. Кездесуде Андрей Лаврентьев Вадим Басинді QARMET компаниясының бас директоры ретінде таныстырды, деп хабарлайды Ortalyq.kz облыс әкімдігінің сайтына сілтеме жасап.
– Әрине, жаңа басшының алдында маңызды міндеттер тұр. Бірінші кезекте еңбек қауіпсіздігін қамтамасыз ету және қызметкерлерге жағдай жасап, әл-ауқатын арттыру қажет. Сондай-ақ әлеуметтік жобалар арқылы жергілікті қоғамдастықты дамытуға белсенді қатысып, көмек көрсету керек, – деді Ермағанбет Бөлекпаев.
Естеріңізге сала кетейік, бұған дейін ҚР өнеркәсіп және құрылыс министрі Қанат Шарлапаев кәсіпорынды Андрей Лаврентьев сатып алғанын жариялаған болатын.
Қазақстандық кәсіпкер активтерді сатып алумен қатар, өндірісті жаңғыртуға және өңірдің экологиясын қорғауға тағы 3 млрд АҚШ долларын құюға міндетті, оның 1,3 млрд доллары алдағы жылы инвестицияланады.
Материалды әзірлеген Ербол ЕРБОЛАТ.
