Қарағандыда өрт сөндіру-құтқару спорты бойынша әлем чемпионаты өтуде
Қарағандыда өрт сөндіру-құтқару спорты бойынша ерлер арасында XVI Әлем Чемпионаты және әйелдер арасында VII әлем чемпионаты басталды. Халықаралық жарыстардың ашылуы “Шахтер” стадионында санитарлық-карантиндік талаптарды сақтай отырып, көрермендерсіз өтті. Спорт мерекесі Жамбыл облысында жарылыс кезінде қаза тапқандарды бір минут үнсіздікпен еске алумен басталды.
Кеншілер қаласы осындай жарыстар өткізілетін Қазақстанның екінші қаласы болды. Шараны Өрт сөндірушілер мен құтқарушылардың халықаралық спорт федерациясы және ҚР ТЖМ ұйымдастырды.
Чемпионатқа әлемнің 10 елінен 10 ерлер және 5 әйелдер командалары қатысуда. Бұл Қазақстан, Ресей, Беларусь, Словакия, Польша, Сенегал, Чехия, Өзбекстан, Моңғолия және Австрия.
Ашылу рәсіміне Ресей Федерациясының Азаматтық қорғаныс, төтенше жағдайлар және табиғи апаттардың салдарын жою министрінің бірінші орынбасары Александр Чуприян, Халықаралық өрт сөндірушілер мен құтқарушылар спорт федерациясының президенті, Беларусь Республикасының Төтенше жағдайлар министрі Вадим Синявский келді.
ҚР ТЖ министрі Юрий Ильиннің айтуынша, Қарағанды кездейсоқ таңдалмаған. Ыңғайлы логистикаға және стандарттарға сәйкес стадионның болуы таңдауға әсер етті. Ашық ауада жарыстар өткізу үшін орын қажет болды.
Стадионда жарыстар өткізу үшін қажетті база дайындалды. Қатысушыларға ыңғайлы болу үшін киім шешетін шатырлар, фудкорт орнатылды. Ұлттық салт-дәстүрлермен танысу үшін этно-ауыл салынды.
Чемпионаттың ашылуы аясында апаттық-құтқару техникасы мен жабдықтарының көрмесі өтті. Онда отандық өнімдер де ұсынылды.
Чемпионат келесі түрлер бойынша жарыстарды қамтиды: оқу мұнарасының төртінші қабатының терезесіне шабуыл сатысымен көтерілу, 100 метрлік кедергілер жолағынан өту, жауынгерлік қанат жаю және 100 метрден 4 өрт эстафетасы. Спортшыларда допингке қарсы сынамалардың тәртібі бар.
Әр тур бойынша жеңімпаздар анықталады. Мысалы, “Оқу мұнарасының төртінші қабатына шабуыл сатысымен көтерілу” түрі бойынша ерлер мен әйелдер арасында финалда автокөліктер ойнатылады.
Жарыстың жабылу салтанаты мен марапаттау рәсімі 5 қыркүйекте өтеді.
