Қарағандыда гранттық өтінім әзірлеу бойынша семинар өтті
Ә.Сағынов атындағы Қарағанды техникалық университетінде ғылыми жобаларды гранттық қаржыландыруға өтінім әзірлеу мәселелеріне арналған семинар ұйымдастырылды. Қатысушылар ғылыми жобаны тиімді таныстыру, оның жаңашылдығын негіздеу және қаржыландыруға мүмкіндік беретін сапалы өтінім дайындау жолдарын талқылады.
Семинарды Малайзия Технологиялық Университетінің профессоры, доктор Хайрур Рижал өткізді. Ол гранттық өтінім әзірлеуде зерттеу мақсатын нақты көрсету, жобаның өзектілігі мен практикалық маңызын дәлелдеу маңызды екенін атап өтті.
Маманның айтуынша, бәсекеге қабілетті өтінімде зерттеудің нақты мақсаты, қазіргі технологиялардың шектеулері, жобаның жаңашылдығы және ықтимал тәуекелдері қамтылуы қажет. Сонымен қатар зерттеу қандай мәселені шешетіні және оның қоғамға қандай пайда әкелетіні түсінікті болуы тиіс.
Семинар барысында зерттеу әдістерін дұрыс таңдау, жобаның іске асу мүмкіндігін негіздеу және күтілетін нәтижелерді жоспарлау мәселелері де қарастырылды. Қатысушылар ғылыми жарияланымдар мен деректер жиынтығы секілді тікелей нәтижелерді жобаның ұзақ мерзімді әсерінен ажыратудың маңызын білді.
Іс-шара соңында зерттеушілерге өтінімнің мазмұнын жетілдіру, әріптестердің пікірін ескеру және сарапшылардың ескертулерін жобаны жақсарту үшін пайдалану жөнінде кеңестер берілді.
Семинар ғылыми жобаларды тиімді таныстыруға және гранттық қаржыландыруға арналған бәсекеге қабілетті өтінімдер әзірлеу дағдыларын дамытуға бағытталды.
Материалды әзірлеген Диас СЕРІКҚАЗЫҰЛЫ
