Қарағанды облысында күн суытады

Қарағандыда алдағы күндері күн салқындап, жел күшеюі мүмкін. «Қазгидромет» мәліметінше, 13–15 қазан аралығында Қазақстанның басым бөлігінде жаңбыр мен қар жауады. Алайда Қарағанды қаласында әзірге жауын-шашынсыз ауа райы болжанып отыр. 

Синоптиктердің болжамына сәйкес, 13 қазанда Қарағандыда түнде ауа температурасы +3…+5°C, күндіз +15…+17°C болады. 14 қазанда күндіз де +15…+17°C шамасында сақталады. Түнде тұман түсуі ықтимал.

Ал Қарағанды облысында ауа райы құбылмалы болады. 13 қазанда күндіз ауа температурасы +15…+20°C, облыстың оңтүстігінде +23°C-қа дейін көтеріледі. 14 қазанда да осындай температура күтіледі. Желдің жылдамдығы 9–14 м/с болып, кей жерлерде екпіні 15–20 м/с-қа жетуі мүмкін. 

Республика бойынша 15 қазанда шығыс пен оңтүстік-шығыстың кей жерлерінде қатты жауын-шашын күтіледі. Шығыс пен солтүстікте көктайғақ болуы мүмкін. Елдің орталық өңірлерінде, соның ішінде Қарағандыда, негізінен жауын-шашынсыз ауа райы болжанып отыр.

Синоптиктер желдің күшеюі мен таңғы тұманды ескере отырып, тұрғындарға ауа райының өзгерісін бақылап отыруға кеңес береді.

Диас СЕРІКҚАЗЫҰЛЫ
Ortalyq.kz