«Алғашқы қадам» – ел игілігі үшін
Мемлекеттің ішкі және сыртқы саясатын жоғары деңгейде жүзеге асыруға қабілетті кадрлар әлеуетін, мемлекеттік қызметшілердің корпусын қалыптастыруға бағытталған «Алғашқы қадам» жобасы жасалды. Жобаның басты міндеті – жоғары оқу орындарының қабілетті, талантты, құзыретті түлектерін мемлекеттік қызметке тарту.
Осы жоба аясында Қарағанды облысында мемлекеттік органдардағы бос жұмыс орындарын саралау бойынша тиісті жұмыс жүргізілді. Елбасының «100 нақты қадам» Ұлт жоспары аясындағы дамыған отыз мемлекеттің қатарына кіру жоспарының маңызды тұстары айтылды. Бұл ретте, қызметшіні мемлекеттік қызметке бейімдеуде мемлекеттің ішкі және сыртқы саясатын жоғары деңгейде жүзеге асыруға қабілетті кадрлар қарастырылды. Олардың қызметтегі әлеуеті үшін – мемлекеттік қызмет имиджін қалыптастырудың маңызды тұстары ескерілді. Сондай-ақ, жиынға қатысқандар мемлекет жүргізіп отырған басқару қызметтерінің тиімді жақтарын қоғамдағы әрекеттер арқылы бағалауды мақсат тұтты. Мемлекеттік орган қызметкерлерінің әрекетін нақты әлеуметтік топтар мен жалпы қоғамның талаптарына сай дәрежеде бекіту жағы көзделді. Мемлекеттік қызмет пен қызметшінің оң имиджін қалыптастыру – осы әлеуметтік институттың тиімді қызмет етуіне, мемлекеттік қызмет жүйесінің маңызын арттыруға сеп болатыны айтылды.
Жалпы, Қазақстан Республикасы Мемлекеттік қызмет істері және сыбайлас жемқорлыққа қарсы іс-қимыл агенттігі Қарағанды облысы бойынша департаменті бастамасымен жасалған саралау жұмыстарының нәтижесі бірқатар мемлекеттік органдарда кадрлық жетіспеушілік орын алғанын көрсетті. Мамандардың айтуынша, сұраныс бар жерде ұсыныстың болары мәлім. Еңбек нарығы дипломы бар кадрларға толып тұр. Алайда, еңбек нарығының ұсыныстарға осыншама кілкіп толғанына қарамастан, сұраныс баяғы қалпынан өзгерген жоқ.
Осыған байланысты, «Алғашқы қадам» жобасы қалыптасқан жағдай бойынша негізгі амалдарды қолдана отырып, шешім шығару үшін жасалды. Бастамаға орай, «Алғашқы қадам» аясындағы жұмыстар жоғары курс студенттері арасында жүргізілмек. Бұған жоғары оқу орны түлектері де қатысады. Жиында айтылғандай мемлекеттік қызметшіде кәсіби біліммен қатар жоғары моральдық жауапкершілік болуы міндетті. Қызметте оны іс жүзінде қолдана біліп, өмірлік ұстанымына айналдыруы тиіс.
Кездесу барысында қатысушылар үшін мемлекеттік қызметке орналасу мүмкіндігі, оның басымдықтары мен пайдалы тұстары жөнінде кеңінен айтылды. Ел дамуының қазіргі кезеңінде мемлекеттік қызметшінің рөлі мен қоғам алдындағы жауапкершілігі туралы ақпарат ұсынылды. Мемлекеттік қызметке орналасудың тиімді тұстары, сондай-ақ, қызметте табысты әрі мүлтіксіз мансап құрудың алғышарттары түсіндірілді.
Алдағы уақытта «Алғашқы қадам» жобасы аясында мемлекеттік қызметке орналасуға ниеттілер үшін – белгілі лауазымды алғанға дейін департамент тарапынан қолдау шаралары жүргізілмек. Сондай-ақ, департамент қызметкерлері мемлекеттік органдарға қызметке орналасудың барлық кезеңдерінде жас мамандарға кәсіби қолдау көрсетпек.
Жалпы, аталмыш жобаның мемлекеттік қызметтің толыққанды дәріптелуіне мүмкіндік жасайтынын айта кеткен жөн. Өңірдегі Қазақстан Республикасы Мемлекеттік қызмет істері және сыбайлас жемқорлыққа қарсы іс-қимыл агенттігінің Қарағанды облысы бойынша департаменті «Алғашқы қадам» жобасын жүзеге асыра отырып, мемлекеттік қызметке орналасуға ниетті барлық азаматтардың талабын қолдайды. Департамент өкілдері: «Мемлекеттің алдыға қойған биік мақсаттарына қол жеткізу үшін барлық мемлекеттік органдар мен билік институттарының тарапынан қосымша күштерді жұмылдыру арқылы жаңа тәсілдерді қолдану қажет. Жиында талқыланып отырған «Алғашқы қадам» жобасы – мемлекеттік қызметшілерге деген сенім деңгейінің артуына және мемлекеттік қызметтің оң имиджін қалыптастыруға серпін береді» дейді.
Аяулым СОВЕТ