Мектеп формасын таңдауда нені ескеру керек?

Жаңа оқу жылы жақындаған сайын ата-аналар балаларын мектепке дайындауға қызу кіріседі. Бұл кезеңдегі ең маңызды сатып алулардың бірі – мектеп формасы. Оқушы күннің басым бөлігін осы киіммен өткізетіндіктен, оның тек сыртқы келбеті ғана емес, жайлылығы мен денсаулыққа қауіпсіздігі де ерекше маңызға ие. Сондықтан мектеп формасын таңдағанда сәні мен бағасына ғана емес, тігілу сапасына, матасының құрамына, сондай-ақ өнімнің қауіпсіздігін растайтын таңбалау мен қажетті ақпараттың болуына да мән берген жөн.

Қазақстан Республикасында міндетті мектеп формасына қойылатын талаптар Қазақстан Республикасы Білім және ғылым министрінің 2016 жылғы 14 қаңтардағы № 26 бұйрығымен белгіленген. Талаптарға сәйкес мектеп формасы оқытудың зайырлы сипатына сәйкес келуі, классикалық үлгіде тігілуі, ыңғайлы әрі оңтайлы болуы тиіс.

Көптеген ата-аналар мектеп формасының неге әр мектепте әртүрлі болатынына қызығушылық танытады. Бұл әрбір орта білім беру ұйымының Қазақстан Республикасының заңнамасына сәйкес мектеп формасына қойылатын талаптарды дербес айқындайтынына байланысты. Мектеп формасының үлгісі білім беру ұйымымен қамқоршылық кеңестің, ата-аналар комитетінің және мектептің өзін-өзі басқару ұйымының бірлескен шешімімен таңдалып, жалпы мектептік ата-аналар жиналысы хаттамасымен бекітіледі. Сондықтан әртүрлі мектептерде форманың түсі мен жекелеген элементтері өзгеше болуы мүмкін, алайда ол белгіленген талаптарға сәйкес келіп, сол мектептің барлық білім алушылары үшін бірыңғай болуы тиіс.

Мектеп формасын сатып алу кезінде ең алдымен бұйымның таңбалануына назар аударыңыз. Жапсырмада міндетті түрде өндірушінің атауы, шыққан елі, матаның құрамы, өлшемі, күтіп ұстау жөніндегі ұсынымдар және өнімнің нарықтағы айналымының бірыңғай белгісі көрсетілуі тиіс. Таңбалаудың болмауы немесе ақпараттың толық көрсетілмеуі өнімнің белгіленген талаптарға сәйкес келмейтінін білдіруі мүмкін.

Матаның құрамына ерекше назар аудару қажет. Күнделікті кию үшін мақта, зығыр немесе жүн сияқты табиғи талшықтардың үлесі жоғары бұйымдарды таңдаған жөн. Табиғи материалдар ауаны жақсы өткізеді, ылғалды сіңіреді және оқу күні бойы жайлылықты қамтамасыз етеді. Киімнің төзімділігін арттырып, оның пішінін ұзақ сақтауға көмектесетін синтетикалық талшықтарды қолдануға рұқсат етіледі, алайда олардың мөлшері шамадан тыс болмауы тиіс.

Бұйымның дайындалу сапасын тексеру де маңызды. Тігістері түзу әрі берік, салбырап тұрған жіптерсіз және матасында ақауларсыз болуы керек. Түймелер, сыдырмалар және басқа да бөлшектер мықтап бекітілуі тиіс. Егер киімнен өткір химиялық иіс шықса, мұндай сатып алудан бас тартқан дұрыс, өйткені бұл өндіріс технологиясының бұзылғанын немесе сапасыз материалдардың пайдаланылғанын көрсетуі мүмкін.

Сатып алар алдында міндетті түрде мектеп формасын балаға кигізіп көріңіз. Ол қимыл-қозғалысты шектемеуі, денені қыспауы және қолайсыздық тудырмауы керек. Балаға отыру, жүру және еркін қозғалу ыңғайлы болуы тиіс. Сондай-ақ, балаға жылдың жылы және суық мезгілдерінде де жайлы болуы үшін форманы маусымға сәйкес таңдаған жөн.

Мектеп формасын мамандандырылған дүкендерден және ресми сауда орындарынан сатып алған дұрыс. Сатып алушы өнімнің сапасы мен қауіпсіздігін растайтын құжаттарды талап етуге құқылы. Таңбалануы жоқ және өндіруші туралы ақпараты көрсетілмеген, шығу тегі күмәнді киімді сатып алмаған жөн.

Дұрыс таңдалған мектеп формасы баланың денсаулығын сақтауға, оқу үдерісі кезінде жайлылықты қамтамасыз етуге және табысты білім алуға қолайлы жағдай жасауға ықпал етеді. Мектеп формасын таңдағанда тек бағасына немесе сыртқы келбетіне ғана емес, оның қауіпсіз, сапалы әрі белгіленген талаптарға сәйкес келетініне көз жеткізу қажет.

Г.Т.ЖҰМАҒҰЛОВА
Шахтинск қаласының Бас мемлекеттік санитариялық
дәрігерінің міндетін атқарушы