Балқаш

Созбаққа салынған Қарағанды-Балқаш тас жолы қашан жөнделіп бітеді?

Бұл туралы ҚР Индустрия және инфрақұрылымдық даму министрлігінің баспасөз қызметі хабарлады. 

Қарағанды - Балқаш
Сурет интернеттен алынды

“Мемлекет басшысы Қасым-Жомарт Тоқаев Қарағанды облысына жұмыс сапары кезінде Қарағанды – Балқаш, Балқаш – Бурылбайтал автожолдарында жүріп жатқан жаңғырту жұмыстарын аяқтауды тапсырды. Қазіргі таңда Қарағанды – Балқаш автомобиль жолында ұзындығы 363 шақырымға жететін 8 жол учаскесінде жаңғырту жұмыстары жүргізіліп жатыр. Аталған жол құрылысы басталғаннан бері негізгі жоғарғы қабаттың 291 шақырымы, төменгі қабаттың 245 шақырымы және жол жабынының жоғарғы қабатының 7 шақырымына асфальт төселді. Асфальтбетон жабынының жаңа қабатымен жол қозғалысы 277 шақырымға қамтамасыз етіліп, жылдың соңына дейін қосымша 10 шақырым автожолды ашу жоспарланып отыр”, – делінген министрлік таратқан ақпаратта. 

Сондай-ақ, жол учаскелерінде жалпы ұзындығы 8 шақырым болатын 16 айналма жол қарастырылған. Жыл соңына дейін тиісті жұмыстарды аяқтап, жаңа жол жабынына байланысты қозғалыс үдерісін 13 айналма жолға ауыстыру көзделген. Қалғандарында жол қозғалысы қамтамасыз етіледі. Министрлік мәліметінше, осы автожолды қайта жаңарту бойынша құрылыс-монтаж жұмыстары 2023 жылдың соңына қарай аяқталады.

“Балқаш – Бурылбайтал автомобиль жолының учаскесінде жүргізіліп жатқан жаңғырту жұмыстарына тоқталсақ, жобаға сәйкес мұнда 288 шақырымның 6 учаскесінде жол жабынын төсеу жүргізіліп жатыр. Жаңа асфальтбетонмен жол қозғалысы 161 шақырым жерге қамтамасыз етілген. Аталған жобаны соңына дейін жеткізу 2023 жылдың соңына межеленіп отыр.

Жезқазған – Қарағанды автомобиль жолы бойынша қазір 513 шақырымға жобалық-іздестіру жұмыстары жүргізіліп жатқанын атап өткен жөн. Бұл жоба 12 учаскеге бөлінген. Жобалау-сметалық құжаттаманы әзірлеуді 2023 жылы аяқтау жоспарланып отыр. Құжаттаманың дайын болуына байланысты тиісті жұмыстар кезең-кезеңмен басталады.

Сондай-ақ Мемлекет басшысы жалпы ұзындығы 200 шақырымға (17-217 шақырым) жететін Қарағанды – Қарқаралы автожолын жөндеуді тапсырды. Осы жол учаскесінің жағдайын жақсарту мақсатында 2021-2022 жылдары ұзындығы 18 шақырым (102-110 шақырым және 197-207 шақырым) жерге орташа жөндеу жүргізілді. Келесі жылы республикалық бюджет есебінен ұзындығы 75 шақырым (132-197 шақырым және 207-217 шақырым) жол учаскелерінде орташа жөндеу жүргізу жоспарланып отыр. Қалған учаскелері 2024 жылы жөнделеді деп көзделуде”, – делінген ақпаратта. 

Басқа материалдар

Back to top button