Балқашта оңалту орталығы күзде ашылады

Күзде Балқашта тірек-қимыл аппараты бұзылған және психоневрологиялық аурулары бар балаларға арналған оңалту орталығы ашылады. Екі қабатты ғимарат жөнделді. Заманауи жабдықтармен жасақталып, қызметкерлер жұмысқа алынуда. Оңалту орталығын облыс әкімі Жеңіс ҚАСЫМБЕК Балқашқа жұмыс сапары барысында аралап қайтты.

Орталықта бір жарым жастан 18 жасқа дейінгі балалар қосалқы ем қабылдай алады. Орталық 50 орынға есептелген.

– Мұндай орталық біздің қаламызда алғаш рет ашылды. Біз бүкіл Қарағанды облысына қызмет көрсетеміз. Штатта 60 адам, оның ішінде, алты дәрігер бар. Жабдықты сатып алып, лицензия алу қалады, – дейді тірек-қимыл аппараты бұзылған және психоневрологиялық аурулары бар балаларға арналған оңалту орталығы директорының міндетін атқарушы Айнұр Кәрімова.

Жеңіс Қасымбек қаланы жаяу аралап шықты. Балқаштың оңтүстік бөлігіндегі қалалық жағажай жағалауында болды. Қала әкімі Ораз Тәуірбеков жағалау көркейіп келе жатқанын айтады. Аумақ көгалдандырылады, пирс, күркелер, дәретханалар, балалар және спорт алаңдары, фудкорт орнатылады.

Аймақ басшысы абаттандырудағы басқа да қалалық жобаларды қарап шықты. Биыл «Жастар» саябағының жөндеу жұмыстары аяқталады. Мұнда олар жаңа тротуар жасайды, жарық, орындықтар мен әткеншектер орнатады.

Сондай-ақ, «Шөміш» субұрқағы жөнделуде. Ол 2017 жылы салынған. Қазір шөмішті бояу жұмыстары аяқталды.

Балқаштың көрікті жерінің бірі – «Тәуелсіздік» алаңы. Оны абаттандыру өткен жылы басталды. Алаңға маңайдағы алқап қосылуына байланысты ауданы әлдеқайда ұлғайды. Қазір электр қуатын тарту және тастар төсеу жүргізілуде. Ескі бөлігінде Ағыбай батыр ескерткіші мен субұрқақ қайта жаңғыртылады. Дулыға іспеттес шатырмен көмкерілген орындықтар, пергола, шамдар орнатылады. Жаңа бөлікте 50 орындық амфитеатр, сахна, шатыры бар балалар алаңы және құрғақ субұрқақ салынады.

Төрт мың шаршы метр көгалдандырылады деп жоспарланып отыр. Автоматты суару жүйесін орнату да көзделген.

Аймақ басшысы Абай көшесінде тұрғын үйлердің қасбеттері мен шатырларын жөндеу жұмыстарымен танысты. Биыл барлығы 18 үй келбетін өзгертеді. Жұмыстар 50%-ға орындалды. Кезекте тұрғандар үшін Балқашта алты таунхаус салынып жатыр. Келесі жылы 71 пәтер тапсырылады.

Жол құрылысы – бақылауда

Облыс орталығына қайтар жолда Жеңіс Қасымбек Қарағанды-Балқаш және Шет пен Ақтоғай аудандарындағы жолдарды ағымдағы жөндеу туралы кеңес өткізді.

– Биыл Қарағанды-Балқаш жолындағы жұмыстар қайта басталған сәттен бастап, 60 шақырымға асфальттың төменгі қабаты төселді. Ұзындығы 9 шақырым 18 айналма жол және 260 шақырым жаңа жол ашылды. Сондай-ақ, 11 көпір 55 пайызға жөнделді. Екі көлік айрығында жұмыстар жалғасуда. Темір жол арқылы өтетін жол өтпесінің құрылысы аяқталуға жақын. 298 су өткізу құбыры төселді, – деді «Қазавтожол» облыстық филиалының басшысы Сырым Хамзин.

Облыс әкімінің баспасөз қызметі.