Баспананы асыға күткен аналарымыз ішкі толқыныстарын жасыра алмады. Осындай мүмкіндік сыйлап, ерекше қолдау білдірген қала басшылығына ыстық ықыластарын жеткізді. Пəтер кілтін қала əкімі Сапар Сатаев табыстады.
– Көпбалалы аналар мен əлеуметтік аз қамтылған отбасылар қашан да назардан тыс қалмайды. Қазіргі таңда қаламызда 1599 көпбалалы отбасы бар. Оның ішінде, 524 ана – «Алтын алқа», «Күміс алқа» иегерлері. Бүгін осы батыр аналардың қатары 5 адамға толықты. Қаламызда қазіргі таңда тұрғын үй кезегінде 212 көпбалалы ана тұр. Биыл жоспар бойынша 44 көпбалалы ананы пəтермен қамтамасыз ету керек болатынбыз, жыл басынан бері 4 анаға пəтер берілді. 40 ана бүгін жаңа пəтер кілтін алмақшы. Келер жылы дəл осындай 40 шақты пəтер беру жоспарда,– деді Сапар Сатаев.
Сондай-ақ, шара барысында Қазақстан Республикасы Президенті Қасым-Жомарт Тоқаевтың Жарлығына сəйкес көпбалалы аналар Перизат Қалкенова, Алмагүл Үсенова, Қайша Сатпаева «Алтын алқа» жəне Гүльфия Чеякова мен Меруерт Шалдыбековаға «Күміс алқа» төсбелгісі салтанатты түрде берілді, сый-сияпаттар жасалды.
Нұрдос КƏРІМ,
БАЛҚАШ
Ortalyq.kz
