Жайлауов жеңіске жетелей ме?

Қазақстан хоккей құрамасының шабуылшысы әрі капитаны Талғат ЖАЙЛАУОВ, қарағандылық «Сарыарқа» командасының қатарын толықтырды. Бұған дейін спортшы өз мансабында Өскеменнің «Торпедосы» мен Нұр-Сұлтанның «Барыс» клубтарында өнер көрсеткен.

Өткен маусымда Талғат Бақытбекұлының елордалық «Барыспен» келісім-шарт мерзімі аяқталған еді. 34 жастағы ойыншы аталмыш команда сапында 11 маусым бойы өнер көрсеткен. Тәжірибелі ойыншы 2001/2002 маусымында 18 жасқа дейінгі жасөспірімдер арасында әлем чемпионы атанған. 2004/2005 жылғы кезеңде Қазақстан чемпионатының алтын медалімен бірге 20 жасқа дейінгі жасөспірімдер арасындағы әлем чемпионатының күміс жүлдесін еншілеген. Ал, 2006/2007 маусымында Қазақстан құрамасына әлем чемпионатының қола медалін алуға еңбегі сіңген. Сондай-ақ «Казцинк-Торпедо» құрамында Қазақстанның екі дүркін чемпионы болып, республиканың үздік хоккейшісі атанады.

Сарыарқа клубы жоғарғы хоккей лигасының (ресей лигасы) осы маусымның 1/8 финалында ресейлік «СКА-Нева» командасына есе жіберіп, ойыннан шығып қалған. Алдағы уақытта, клуб басшылары жаңа ойыншыдан үлкен үміт күтетінін айтады. Шайбаны қақпаға тоғытудан алдына жан салмайтын шабуылшыға тек сәттілік тілейміз!

Ербол ЕРБОЛАТ.