1 сәуір – Қазақ өнері күні
2019 жылы Қарағандыда «Қазақ халқының мұрасы» кітаптар сериясының бастамасымен «Ұлт құндылықтарын сақтау мен насихаттауға бағытталған Қазақ күнтізбесінің» тұсауы кесілген-тін. Осы Қазақ күнтізбесіндегі 1 сәуір – Қазақ өнері күні болып белгіленген. Осы күннің қарсаңында республикалық Qazaq club-тың, облыстық білім басқармасы мен қалалық білім бөлімінің қолдауымен 80-нен астам білім ордасында Қазақ өнері күніне орай тәрбие сағаты, тақырыптық кітап көрмелері ұйымдастырылып, жас жеткіншектер өз өнерлерін көрсетті.
Мәселен, Әл-Фараби атындағы мектеп-гимназиясында оқушылар сынып сағатта және үзіліс кезінде домбырада ойнаса, Мағжан Жұмабай атындағы гимназияның барлық сыныбында «1 сәуір – Қазақ өнері күні» тақырыбында тәрбие сағаты өтті. «Қазақ өнері тарихы» тақырыбында кітап көрмесі ұйымдастырылып, соңы сазды кеш бағдарламасына ұласты.
Ал, Ә.Ермек атындағы мектеп-лицейінде 10-сынып оқушылары арасында әншілік дәстүр, халық өнері мен музыкасын насихаттау мақсатында «Өнер – өмір өрнегі» атты танымдық-интеллектуалдық сайыс ұйымдастырылды. Сондай-ақ, Абай атындағы мектеп-гимназиясында оқушылар «Нұрғиса ағамдай боламын!» атты сынып сағатында өз өнерлерін көрсетті.
Ербол ЕРБОЛАТ,
Оrtalyq.kz