Вакциналарды араластыруға болмайды

«Ресейлік вакцинаның бірінші компонентін алып, содан кейін «QazVac» вакцинасын алуға бола ма?», «Нәтижесі қандай болады?» Орталық коммуникациялар қызметінде өткен сараптамалық брифингке қатысушыларға осындай сұрақ қойылды. Мамандар мұндай тәжірибелерге үзілді-кесілді қарсы.

Медицина ғылымдарының докторы, профессор Ләззат Ералиеваның айтуынша, бұл дұрыс емес.

– Вакцинаны кезекпен салдыруға болмайды. Антиденелердің қалыпты деңгейін алу үшін вакцинацияны бір вакцинамен аяқтау қажет. Себебі, «QazVac» пен «Спутник V» вакциналары технология, дайындау әдістері бойынша мүлдем өзгеше. Егер, біз бір екпемен егілудің толық курсын аяқтамай, басқасын салдыратын болсақ, бұл мағынасыз болады, – деп кесіп айтты ҚР Денсаулық сақтау министрлігі физиопульмонология ұлттық ғылыми орталығы директорының клиникалық және ғылыми жұмыстар жөніндегі орынбасары.

Медицина ғылымдарының докторы, профессор, дәрілік заттар мен медициналық бағыттағы бұйымдарды сараптау ұлттық орталығының сарапшысы Александр Гуляев бұл мәселеде әріптесімен келісетінін жеткізді.

– Бұл әртүрлі вакциналар: белсенді емес, поливирионды вакцина және вирустың жеке ақуыздары бар субуниттік вакцина. Оларды бірге қолдануға болмайды. Бұл қарастырылмаған. Қазақстандық вакцинаны ресейлік вакцинамен араластыру гипотетикалық тұрғыда да талқыланбайды. Бұл мүлдем әртүрлі екпелер және вакцинация кезінде оларды ауыстыруға болмайды, – деді сарапшы.

Ол еске салып өткендей, «Спутник V» және «AstraZeneca» вакциналары біртипті болғандықтан оларды аралас алу жолдары талқыланған. Бірақ, бұл мәселе сол күйінде қалды. Себебі, клиникалық зерттеулер және басқа дәлелдер қажет.