Төл белгі – Тәуелсіздік нышаны

Н.Гоголь атындағы облыстық әмбебап ғылыми кітапханада 16 желтоқсан – Қазақстан Республикасының Тәуелсіздік күніне орай Қарағандыда «Қазақ халқының мұрасы» кітаптар сериясының Qazaq club бастамасымен «Тәуелсіздік белгісінің» тұсаукесері өтті.

Биыл көпшілікке ұсынылған «Тәуелсіздік белгісі» осыған дейін 2020 жылы жарық көрген «Тәуелсіздік лентасының» негізінде жасалды. Аталған төсбелгінің ортасында Қазақстан Республикасының қазіргі жер аумағын бейнелейтін карта сызылған. Сонымен қатар, Қазақстан аумағын біздің жыл санауымызға дейін 5-4 ғасырларда мекен еткен сақтардың Есік қорғанынан табылған Алтын адамы бейнеленген. Бұл қазақ тарихының сақтар заманымен байланысты екенін білдіреді. Бұдан кейін белгіде ғұндар мемлекетінің негізін қалаған Мөде қаған және ғұн мемлекеттілігінің шаңырағы көтерілген б.з.д 209 жыл көрініс тапқан.

«Тәуелсіздік белгісіндегі» келесі айтулы мерзім 552 жыл, яғни, Түркі қағанаты құрылған жыл және оның символы Бөрілі байрақ бейнеленген. Сонымен қатар, Қазақ хандығының шаңырағы көтерілген 1465 жыл мен Керей мен Жәнібек хандар салынған. Тәуелсіздік белгісіндегі келесі көрнекті тұлға үш жүздің басын қосқан Абылай хан мен ол сайланған 1771 жыл, ұлтымыздың Тәуелсіздігі үшін күресіп өткен және Кенесары Қасымұлы хан атанған 1841 жыл және Алаш көсемі Әлихан Бөкейхан бастаған Алашорда Үкіметі құрылған 1917 жыл да бейнеленген. «Тәуелсіздік белгісінің» жоғарғы жағында Қазақстан Республикасы Тәуелсіздігі жарияланған 1991 жыл көрініс тапқан. Ал, көтеріліп келе жатқан күн қазақ халқы үшін жаңа дәуірдің келгенін, ал ашылып тұрған кітап еліміздің болашағы ғылым-білімде жатқандығын меңзейді. Тәуелсіздік белгісінің өн бойындағы ұлттық ою-өрнек біздің ұлттық мәдениетіміз бен болмысымызды әруақытта көздің қарашығындай сақтауға үндейді. Ел игілігіне бағытталған бұл жобаны қаржыландырған «Qazaq club».

Белгіні жасаған мамандар «Тәуелсіздік белгісі» кеуденің сол жағына жүрек тұсына тағылатынын айтады. Бұл белгіні тағып жүру – әрбір азамат үшін үлкен жа- уапкершілік екенін есте сақтау керек дейді ұйымдастырушылар. Белгінің иегері онда бейнеленген ұлы тұлғалардың жолын жалғастыруға, сақтауға, оны жас ұрпаққа насихаттауға атсалысуға мүмкіндігі келгенше тырысуы керек. «Тәуелсіздік белгісі» Қазақстан Республикасының мемлекеттік мерекелері күндері, салтанатты шараларда тағуға арналған. Сондай-ақ, белгіні ел тарихына құрмет білдіру мақсатында күнделікті тағуға да болады.

Жан АМАНТАЙ.

Оrtalyq.kz