Тұлғалар бейнесі – пошта маркаларында
Жуырда «Қазпошта» АҚ атақты қазақ ғалымдары, қоғам және мемлекеттік қайраткерлері – Әлихан Бөкейхан, Ыбырай Алтынсарин, Қайым Мұхамедхановтың мерейтойлық күндеріне арналған «Естелік және мерейтойлық күндер» сериялы пошта маркаларын айналымға енгізді.
«Естелік және мерейтойлық күндер» сериялы пошталық маркасы «Әлихан Бөкейханның туғанына 150 жыл» тақырыбында көрнекті қоғам және мемлекеттік қайраткер, “Алаш” ұлттық-демократиялық партиясының ұйымдастырушысы және көшбасшысы, тұңғыш қазақ ұлттық Алашорда үкіметінің басшысы, ғалым, публицист – Әлихан Бөкейханды бейнелеген. Бүгінгі күні марканың номиналы – 5 теңге, ал, таралымы 2 500 000 дана болып отыр.
Сонымен қатар, «Естелік және мерейтойлық күндер» сериялы пошта маркасы қазақтың көрнекті ағартушысы, жаңашыл-педагог және жаңа мектептер ұйымдастырушы, этнограф, ауыз әдебиетін жинақтаушы, ақын, прозашы, аудармашы – Ыбырай Алтынсаринді де бейнелеп отыр. Пошталық марканың номиналы – “А” литерлі (121) теңге заңды тұлғаларға арналған 20 грамм салмаққа дейінгі қарапайым хаттарды жерүсті көлігі арқылы жіберуге арналған тарифке сәйкес келеді. Таралымы 2 500 000 дана.
Пошталық маркада сондай-ақ, Қазақстан Республикасының Мемлекеттік сыйлығының лауреаты, ғалым, ақын, жазушы, драматург, аудармашы, Абайтану мен Шәкәрімтанудың ғылыми негізін қалаушы, қоғам қайраткері – Қайым Мұхамедханов та бейнеленген. Қазақ КСР-ның (1945 жыл) Мемлекеттік әнұраны мәтінінің авторы, Ұлы Отан Соғысына қатысушы. Пошталық марканың номиналы – “С” литерлі (218) теңге Қазақстан Республикасы аумағында жерүсті көлігі арқылы салмағы 20 граммға дейінгі тапсырысты хаттарды жөнелтуге арналған тарифке сәйкес келеді. Таралымы – 2 500 000 дана.
Пошта маркасының басылымы офсеттік, 2 бояумен, шетіндегі ойықтар ирек тісті. Шығарылу түрі – маркалық бет. Бір бетте – 105 марка. Беттегі марка өлшемі 26Х18 мм. Суретші – Сергей Маршев. Пошталық маркалар “Қазақстан Республикасының Ұлттық Банкі Банкноттық фабрикасы” республикалық мемлекеттік кәсіпорнында басып шығарылған.
Мирас АСАН
