МедицинаРесми

Стоматолог кімді тегін емдейді?

Әлеуметтік медициналық сақтандыру қоры биылғы жылы стоматологиялық клиникалармен тікелей жұмыс істей бастады. Қарағанды облысында қандай жеке мекемелермен шарт жасалғаны жайлы қор филиалы мәлім етті.

Сонымен, МӘМС есебінен тегін қызметті Қарағанды қаласындағы «Стома на Востоке», «Стоматолог Элит», «Ердос», «Стоматологиялық бірлестік», «Стома плюс», Теміртау қаласындағы AriDent және Приозерск қаласындағы «Асқанбаев мақсат» ЖК тіс клиникаларынан алуға болады.

«Сонымен қатар, тиісті жабдықтары мен мамандары бар емханаларда МӘМС аясында стоматологиялық көмек алуға болады», – деп толықтырды қор қосынында.

Бүгінде стоматологиялық көмек кімге қолжетімді?

МӘМС жүйесіндегі немесе ТМККК шеңберіндегі стоматологиялық қызметтер барлығына емес, халықтың жекелеген әлеуметтік осал санаттарына ғана қолжетімді. Мысалы, жоспарлы стоматологиялық көмекті тек балалар мен жүкті әйелдер ала алады. Шұғыл ауырсыну байқалған кезде азаматтардың 10 санаты, оның ішінде балалар мен жүкті әйелдер, зейнеткерлер, мүгедектігі бар адамдар және оларға күтім жасайтын жұмыс істемейтін адамдар, мүгедектігі бар яки бірінші топтағы мүгедектігі бар балалар, әлеуметтік маңызы бар және жұқпалы аурулары бар пациенттер, көпбалалы аналар, атаулы әлеуметтік көмек, әлеуметтік көмек алушылар және басқалар болуы мүмкін.

«Емханадан жолдама талап етілмейді. Ең бастысы, пациент МӘМС немесе ТМККК бойынша стоматологиялық көмек алушылардың санаттарының біріне кіруі және медициналық көрсеткіштері болуы тиіс», – деп атап өтті қорда.

МӘМС есебінен қандай стоматологиялық қызметтерді алуға болады? Тізім үлкен. Стоматологиялық клиникалар амбулаториялық деңгейде консультациялық-диагностикалық қызметтер ұсынады. Мұнда сіз тісіңізге пломба салдырып, ауруы асқынған тісті жұлдырып, анестезия ала аласыз.

Сондай-ақ, МӘМС-те жақ-бетаймағының туа біткен патологиясы бар балаларға амбулаториялық деңгейде ортодонтиялық пластина орнатылады. Егер пациенттерде стационарлық жағдайда стоматологиялық көмек алу үшін көрсеткіштер болса, онда ол ауруларды диагностикалау және емдеу хаттамаларына және Қазақстан Республикасында стоматологиялық көмек көрсетуді ұйымдастыру стандартына сәйкес көрсетілетін болады (Ескертпе: ҚР ДСМ 2016 жылғы 12 желтоқсандағы № 1053 бұйрығы).

Стоматологиялық клиниканы өзіңіз таңдай аласыз ба? Иә, бірақ алдымен ол клиника әлеуметтік медициналық сақтандыру қорының жеткізушісі екенін анықтаған жөн. Қызмет көрсетушілер тізімін ресми сайттан көруге немесе клиниканың өзінен сұрауға болады.

Қызмет көрсетуден бас тартқан немесе басқа да проблемалар туындаған жағдайда клиниканың пациенттерді қолдау қызметіне немесе qoldau 24/7 мобильдік қосымшасы арқылы немесе 1406 қысқа нөмірі бойынша медициналық сақтандыру қорына жүгінуі қажет.

Ерқанат КЕҢЕСБЕКҰЛЫ.

Оrtalyq.kz

Басқа материалдар

Back to top button