Өрт сөндірушілерге Президент Жарлығымен мемлекеттік наградалар табысталды

ҚР Президенті Қасым-Жомарт Тоқаевтың Жарлығымен Абай облысында шыққан өртті сөндіруге ат салысқан 22 адамды мемлекеттік наградамен марапаттады. Оның ішінде облыстық ТЖД қызметкері Бекболат Жиреновқа – «Ерлігі үшін» медалін, Ілияс Қасымовқа – ІІІ дәрежелі «Айбын» орденін табыстады. Төтенше жағдайлар жөніндегі бірінші вице-министр Ибрагим Күлшімбаев марапатты салтанатты түрде табыстады.

Бекболат Жиренов азаматтық қорғау органдарында 2016 жылдан бері қызмет етіп келеді. Бүгінде ол облыстық ТЖД Өрт сөндіру және авариялық-құтқару жұмыстары қызметінің мамандандырылған жасағы бөлімшесінің командирі.

Ал, Ілияс Қасымов азаматтық қорғау органдарында 2015 жылдан бері қызмет етіп келеді. Балқаш қаласының № 4 мамандандырылған өрт сөндіру бөлімі бөлімшесінің командирі.

Естеріңізге сала кетейік, Абай облысында шыққан өртті сөндіру үшін облыстық ТЖД мамандары көмекке жіберілгені жайлы жазған болатынбыз.

Аида РАХЫМҚҰЛОВА,
Ortalyq.kz