Республикалық мүшәйра өтеді

Қарағанды облысы әкімдігінің қолдауымен, облыстық тілдерді дамыту басқармасының ұйымдастыруымен дауылпаз ақын Қасым Аманжолов атындағы «Дүниеге келер әлі талай Қасым» атты республикалық жыр мүшәйрасы өтеді.

Жыр додасына 20-35 жас аралығындағы ақындар қатыса алады. Мүшәйраның талабы бойынша үміткер Қасым Аманжоловқа арнау және еркін тақырыптағы 2 өлеңін 2023 жылғы 15 қыркүйекке дейін kar_til@krg.gov.kz электронды мекенжайы бойынша жолдауы тиіс.
Байқауға жинақтарда, мерзімді басылымдарда, сайттарда, әлеуметтік желілерде жарияланған және талапқа сай келмейтін шығармалар қабылданбайды.

Үміткерлердің шығармаларын бағалау кезінде ұсынылған шығармалар тақырыбының байқау мақсатына сәйкестігіне, шығарманың идеялық мазмұнына, туындының көркемдік сапасына, автордың стильдік ерекшелігіне баса назар аударылады.
Мүшәйра жеңімпазы мен жүлдегерлері дипломдар және ақшалай сыйлықтармен марапатталады.
Байқау қорытындысы қазан айында шығарылады деп жоспарлануда.

Ілияс ДҮНГЕНБАЙҰЛЫ