Наурыз мерекесі 10 күн тойланады
Қарағанды облысында Наурызды мерекелеу 14 наурызда басталып 23 наурызға дейін жалғасады. 10 күн ішінде облыс аумағында түрлі іс-шаралар ұйымдастырылады. Бұл туралы облыс әкімдігіндегі аппараттық кеңесте мәдениет, архивтер және құжаттама басқармасының басшысы Еркебұлан Жұмакенов айтты.
Басқарма басшысы Наурыз мерекесінің күнтізбесін ұсынды. Әр күн белгілі бір тақырыпқа арналған:
14 наурыз – «Көрісу күні-Амал мерекесі»;
15 наурыз – «Қайырымдық күні»;
16 наурыз – «Мәдениет және ұлттық салт-дәстүр күні»;
17 наурыз – «Шаңырақ» (отбасылық құндылықтар күні);
18 наурыз – «Ұлттық киім күні»;
19 наурыз – «Жаңару»;
20 наурыз – «Ұлттық спорт»;
21 наурыз – «Ынтымақ»;
22 наурыз – «Жыл басы» (бұқаралық мерекелер, көктемгі күн мен түннің теңелу күні);
23 аурыз – «Тазару» (табиғат күні).
Сонымен қатар, 22 наурыз күні сағат 12.00-де Орталық мәдениет және демалыс саябағында «Құс қанатындағы Наурыз» атты басты театрландырылған қойылым өтеді. Экспозициялық киіз үйлер орнатылады, ұлттық спорт түрлері бойынша спорттық жарыстар, сәндік-қолданбалы өнер көрмелері, ұлттық тағамдарды дайындау бойынша отбасылық байқаулар ұйымдастырылмақ.
Сондай-ақ, мерекелік іс-шаралар қаланың төрт алаңында өтеді: Жаңа Майқұдық МҮ, «Молодежный» МҮ (Пришахтинск), Теміржолшылар МҮ (Сұрыптау) және Достық үйінің (Оңтүстік-Шығыс) алдындағы алаңда.
Он күн бойы қалалар мен аудандарда Наурыз мейрамына арналған іс-шаралар жоспарланған. Мәселен, 16 наурызда Global City аумағында ауыл шаруашылығы жәрмеңкесі өтеді. 18 наурызда Кеншілер мәдениет сарайында NAURYZ-FASHION этно-заманауи киім фестивалі өтеді. 20 наурызда облыс орталығында мемлекеттік қызметшілер арасында спартакиада, тазы тұқымдас иттер және аңшы құстар көрмесі өтеді.
Бұл күні аудандарда көкпар, сондай-ақ қазақ күресі мен тоғызқұмалақтан жарыстар мен турнирлер өтеді. 23 наурызда өңірлерде су айдындарын тазалауға және аумақтарды қар мен қоқыстан тазартуға бағытталған тазалық эстафетасы басталады.
Аида РАХЫМҚҰЛОВА,
Ortalyq.kz
