Ұлттық спорт танылып келеді
Олимпиада бағдарламасына қазақ күресі енуі мүмкін. Бұл туралы Халықаралық қазақ күресі федерациясының президенті Қанат БОЗЫМБАЕВ айтты.
– Олимпиада ойындарының бағдарламасына қазақ күресін қосуы мүмкін. Бірақ, бірден қосу екіталай. Қосқан жағдайда қазақтың ұлттық спорт түрін әлем мойындағаны деп білер едік. Біз осы бағытта жұмысты бастадық, – деді Қанат Бозымбаев.
Осыған орай Астанада өткен Халықаралық қазақ күресі федерациясының Құрылтайшы Конгресіне 36 елдің делегаттары қатысты. Аустралия, Гана, Канада, Жаңа Зеландия, Уругвай, Германия және тағы басқа елдердің өкілдері өз аймағында қазақ күресінің дамуын қолдады. Конгресс қатысушыларының арасында танымал спортшылар мен жаттықтырушылар, атап айтсақ, дзюдо бойынша Олимпиада ойындарының қола жүлдегері мен әлем чемпионатының күміс жүлдегері, сондай-ақ, «Әлем барысы» турнирінің жеңімпазы Брайсон Ведаль Оскар Рене (Куба), Олимпиада чемпионы Лукаша Крпалектің жеке жаттықтырушысы Лойер Джаромир (Чехия) және тағы басқалар болды.
Өз тілшімізден.