Елена Рыбакина Канададағы турнирде ширек финалға өтті

Қазақстанның бірінші ракеткасы Елена Рыбакина Канаданың Торонто қаласында өтіп жатқан WTA 1000 санатындағы турнирде ширек финалға жолдама алды.

Әлемдік рейтингте екінші орында тұрған қазақстандық теннисші 1/8 финалда ресейлік Людмила Самсоновамен кездесті. Үш сетке созылған матчта Рыбакина 6:4, 4:6, 6:4 есебімен жеңіске жетті.

Матч 2 сағат 55 минут өтті. Қазақстандық спортшы матч барысында 11 эйс жасап, алты рет қосарланған қателікке жол берді. Сондай-ақ Рыбакина 17 брейк-пойнттың жетеуін пайдаланды.

Бұл жеңіс Елена Рыбакинаға Торонто турнирінің ширек финалына шығуға мүмкіндік берді.

Енді қазақстандық теннисші келесі кезеңде канадалық Лейла Фернандес пен жапониялық Наоми Осака арасындағы кездесудің жеңімпазына қарсы ойнайды. Фернандес әлемдік рейтингте 34-орында болса, Осака 13-сатыда тұр.

Айта кетейік, Торонто қаласындағы жарыс WTA 1000 санатына жатады және әйелдер теннисіндегі беделді турнирлердің бірі.

Диас СЕРІКҚАЗЫҰЛЫ
Ortalyq.kz