ДЕПУТАТ – ЕЛ АРАСЫНДА
Сәрсенбі күні ҚР Парламенті Сенатының депутаты Рысқали ӘБДІКЕРОВ Қарағанды қалалық әкімдігінің қабылдау бөлмесінде азаматтарды жеке мәселелері бойынша қабылдады.
Рысқали Қалиақбарұлының қабылдауына он бір тұрғын келді. Екі азаматтың өтініші дереу оң шешімін тауып, бес өтініштің келешекте қаралуы бақылауға алынды.
Сонымен қатар, төрт өтініш бойынша тиісті түсіндірулер берілді. Қарағанды қаласы әкімінің орынбасары А.Молдабековке олардың өтініштерін мұқият зерделеп, көрсетілген мерзімде жауабын беру ұсынылды.
Қабылдауда Қарағанды қаласының тұрғыны Т.Шутова ажырасқан және алимент ала алмай жүрген отбасылар мәселесін қозғады. Аталған жағдайға душар болған отбасылардың кәмелетке толмаған балаларының құқықтарын қорғау үшін арнайы қор ашу қажеттігін жеткізді.
Қарағанды қаласының тұрғыны О.Гарницкий қаланың кейбір аудандарында орталықтандырылған жылумен қамтамасыз ету, ыстық сумен, газбен жабдықтау мәселелерінің шешілмей жатқанын ортаға салды. «Қорғау» ардагерлер кеңесінің мүшесі В.Чайка ардагерлердің қаланың, облыстың дамуына, жас ұрпақты тәрбиелеуге қосқан елеулі үлестері туралы баяндады. Осы орайда, қала ардагерлерінің атынан «Ардагерлер туралы» Заң қабылдау жөнінде ұсыныс жасады.
Өз тілшімізден.
ҚАРАҒАНДЫ қаласы.