City Mall сауда үйіне бомба қойылғаны рас па?

Бүгін сағат 14.40-та Қарағанды полицейлеріне City Mall сауда үйіне бомба қойылғаны туралы ақпарат түсіп, барлық келушілер, сонымен қатар сауда орталығының қызметкерлері ғимарат сыртына шығарылды.

Оқиға орнына қаланың барлық төтенше жағдайлар қызметі: полиция, құтқарушылар және дәрігерлер жұмылдырылды. Адамдардың сауда орталығы ғимаратына жақындауына тыйым салынып, барлық көліктер City Mall сауда орталығының тұрағынан шығарылды.

Қарағанды облысының полиция департаменті сауда үйінің үй-жайын тінту кезінде жарылғыш зат табылмағанын хабарлады.

– Бүгін сағат 14:40-та City Mall сауда орталығына жарылғыш зат қойылғаны туралы хабарлама келіп түсті. Оқиға орнына Қарағанды облысы ІІД жедел кезекші бөлімі барлық қызметтерді жұмылдырды. Полиция ғимараттың аумағын тексерді. Ешқандай жарылғыш зат табылған жоқ, – деді облыстық Полиция департаментінің баспасөз қызметі.

Бұл факті полицияға тіркелді. Қазір полиция лаңкестік актісі туралы жалған хабардың авторын іздестіріп жатыр.

Ілияс ДҮНГЕНБАЙҰЛЫ