Бокстан Бусто-Арсициода өтіп жатқан Париж Олимпиадасына іріктеу турнирінде Қазақстан қоржынына бес жолдама түсті.
92 келіге дейінгі салмақта сынға түскен Айбек Оралбай ширек финалда америкалық Джамар Таллимен кездесіп, 5:0 есебімен жеңіске жетті.
Ал, 51 келіде сынға түскен Сәкен Бибосынов ширек финалда ұлыбританиялық Кириан Макдонльды 4:0 есебімен жеңді.
57 келіге дейінгі салмақта жұдырықтасқан Махмұд Сабырхан тәжікстандық Ашрор Вахидовты 4:1 есебімен жеңіп, жолдама иеленді.
Қазақстан командасының капитаны Асланбек Шымбергенов те әзірбайжандық Сархан Алиевті 5:0 есебімен жолда қалдырды.
80 келіге дейінгі салмақта сынға түскен Нұрбек Оралбай ширек финалда ирландиялық Киллиан Кессидимен жұдырықтасып, 3:2 есебімен басым түсті. Осылайша, Нұрбек Оралбай ерлер құрамасынан Париж Олимпиадасына алтыншы жолдаманы қоржынға салды.
Әйелдер арасында өнер көрсеткен Валентина Хальзова ұлыбританиялық Синди Нгамбамен жұдырықтасып, қарсыласынан айласын асыра алмады. Жекпе-жек бойы қарсыласынан басым болған отандасымыз үшінші раундта нокдаунға түсіп қалды. Сонымен қатар, 50 келіге дейінгі салмақта сынға түскен Алуа Балқыбекова ширек финалда германиялық Карина Макси Клецермен кездесіп, 3:2 есебімен қарсыласынан жеңіліп қалды. Өкінішке қарай, бокстан Қазақстан әйелдер командасы Италиядағы іріктеу турнирінде жолдамасыз қалды.
Ербол ЕРБОЛАТ,
Ortalyq.kz
