Облыстағы бірқатар білім беру мекемесі мен мәдениет ошағына қазақтың біртуар тұлғаларының есімі берілді. Бұлардың қатарында Теміртау қаласы, Бұқар жырау және Жаңаарқа аудандарындағы мекемелер бар.
Сонымен, ел Үкіметінің Қаулысымен Теміртау қаласындағы №15 қазақ мектеп-гимназиясы – Әлихан Бөкейханның, №23 мектеп-лицейі – Бауыржан Момышұлының, Бұқар жырау ауданындағы №1 қазақ тірек мектебі (ресурстық орталық) – Сұлтанмахмұт Торайғыровтың және Жаңаарқа ауданының орталықтандырылған кітапханалар жүйесі Сәкен Сейфуллиннің есімін иеленді.
Бұдан бөлек, Бұқар жырау ауданындағы жеті мектептің атауы өзгерді. Яғни, Центральный орта мектебі – Сәбит Мұқанов атындағы орта мектеп, Новоузенка жалпы білім беру орта мектебі – Мәшһүр Жүсіп атындағы жалпы білім беру орта мектебі, Кузнецкий жалпы білім беру орта мектебі – Жүсіпбек Аймауытұлы атындағы жалпы білім беру орта мектебі, Ленин жалпы білім беру орта мектебі – Ыбырай Алтынсарин атындағы жалпы білім беру орта мектебі, Петровка жалпы білім беру орта мектебі – Әлкей Марғұлан атындағы жалпы білім беру орта мектебі, Гагарин орта мектебі – Талғат Бигелдинов атындағы орта мектеп, Елтай жалпы білім беру орта мектебі – Ахмет Байтұрсынұлы атындағы жалпы білім беру орта мектебі болып қайта аталды.
«Тәрбие басы – талбесік» деген. Патриот азаматтар тәрбиелейміз десек, мектептен бастаған жөн. Ұрпағымыз Алаштың арда ұлдарының өнегесіне қарап, бой түзесе, өшкеніміздің жанғаны емес пе?!
Нұрқанат ҚАНАПИЯ.
