АймақШахтинск

Жұмыс бар, ниет жоқ

Шахтинскіде «Жұмыспен қамтудың жол картасы» аясында 2,5 миллиардтан астам сомаға 37 жобаны іске асыру жоспарлануда. Жұмыспен қамту орталықтары арқылы 242 адам жұмысқа орналастырылды. Бірақ, жұмыс орындарының болуына қарамастан, жұмыссыз жүрген Шахтинск тұрғындары асығар емес. Бұл туралы қала әкімі Сержан Аймақов онлайн-конференцияда айтты.

– Шахтинск қаласында, сондай-ақ Долинка, Шахан және Новодолинский кенттерінде осы жылы 717 жұмыс орнын құруға мүмкіндік беретін 2 млрд. 572 млн. теңгенің 37 жобасы жүзеге асырылады. Оның ішінде жұмыспен қамту орталығы арқылы 348 адам тартылады, – деді Сержан Аймақов.

Қазіргі уақытта Жол картасы бойынша 340-тан астам адамды жұмысқа орналастыруға мүмкіндік бар. Алайда, Шахтинск қаласының тұрғындары жұмыспен қамту орталығына баруға асығатын емес. Әкім жұмыссыздарды бағдарламаға белсенді қатысуға шақырды. Сондай-ақ, мемлекеттік қолдаудың басқа да түрлері туралы айтып өтті.

– Бүгінде жоғары біліктілікті талап етпейтін жұмысшы мамандықтардың тапшылығы сезіледі. Біз қалада құрылған жұмыс орындарын көрші өңірлерден келген азаматтар толтырып жатқанына көнуге мәжбүрміз. Сондай-ақ, Шахтинск қаласында жастар тәжірибесі, өз ісін ашуға гранттар беру, жұмыс істеп тұрған бизнесті кеңейту үшін шағын несие беру, қайта мамандандыру және жаңа мамандықты оқыту сияқты бағдарламалар да белсенді жұмыс істеуде, – деді қала басшысы. – Жұмыспен қамту және әлеуметтік бағдарламалар бөлімі, сондай-ақ халықты жұмыспен қамту орталығы осы бағдарламаларға қатысуға ниетті адамдарды іздейді және оларды ынтымақтастыққа шақырады.

Шахтинск қаласы әкімінің айтуынша, «Жұмыспен қамтудың жол картасы» бағдарламасы тек жұмыс орындарын ашуға ғана емес, сонымен қатар, қаражат жетіспейтін мәселелерді шешуге көмектеседі. Мысалы, биылғы жылы жол-құрылыс жұмыстарына 800 млн. теңгеден астам қаржы бөлінген. Ал, осыған дейін бөлінген қаражатың көлемі 280-300 млн. теңгеден аспайтын.

Сондай-ақ, қалада жыл сайын 5-7 аула абаттандырылып келген. Биылғы бюджет тағы 12 ауланы ретке келтіруге мүмкіндік береді. Жаяу жүргіншілер жолдары, жарықтандыру, коммуналдық тұрғын үй қорын жөндеу бойынша да мәселелер шешіледі.

– Білім беру саласына тоқталар болсақ, мектептердің барлығы, балабақшалардың 70%-дан астамы түрлі көздерден жұмылдырылған қаражатқа жөндеу жұмыстарын жүргізді. Мәдениет нысандарының түгелі ағымдағы және орташа жөндеуден өтеді. Біздің міндетіміз – барынша қысқа мерзімде барлық жоспарланған жұмыстарды сапалы жүргізу, – деп атап өтті Сержан Аймақов.

Сонымен қатар, Шахтинск қаласының әкімі карантин шараларын сақтаудың маңыздылығына назар аударды. Бүгінгі күні қалада КВИ жұқтырудың 109 жағдайы тіркелген. Оның ішінде бір науқас көз жұмған.

– Тұрғындардың санитарлық қауіпсіздік шараларына, әсіресе қоғамдық орындарда толық жауапкершілікпен қарауын сұраймын. Естеріңізде болсын, барлық қажетті ережелерді сақтай отырып, сіздер өздеріңізді ғана емес, айналаңыздағыларды да қорғайсыздар. Өздеріңізді және жақындарыңызды сақтаңыздар! – деді Сержан Аймақов.

Өз тілшімізден.

ШАХТИНСК қаласы.

Басқа материалдар

Back to top button