Қос мықты қашан жұдырықтасады?
Ел-жұрт жерлесіміз Геннадий ГОЛОВКИННІҢ мексикалық Сауль АЛЬВАРЕСПЕН үшінші жекпе-жегін күтіп жүр. Ал, ол үшін міндетті түрде басқа боксшылармен кездесуі қажет.
Қос мықтының қарсыластары америкалық боксшы Джермалл Чарло (30-0, 22 КО) мен украиналық Сергей Деревянченконың (13-2, 10 КО) алдағы күзде болатын кездесуінен кейін анықталады.
«26 қыркүйекте Джермалл Чарло рингтен тыс жеңіп алған WBC титулын үшінші мәрте қорғауға Анкасвилде Сергей Деревянченкомен кездеседі. Бұл жекпе-жектің жеңімпазы Канело және Головкин сынды мықтылармен жұдырықтасуға мүмкіндік алады», – деді Boxingnews24.com сайтының авторы Джефф Аранау.
Головкин қазан айында IBF тұжырымдамасы бойынша міндетті үміткер, поляк боксшысы Камил Шереметамен кездесу өткізіп, 2021 жылдың мамырында Канеломен рингке шығуы тиіс.
Өз тілшімізден.