Құжат рәсімдеуге көмектесті
Облыс прокуратурасы мен көші-қон полициясы бірлесіп, «тұрғындар сенімі» жобасының аясында, Бұқар жырау ауданына қарасты шалғайда жатқан 5 ауылдық округке барып, Қазақстан Республикасының жеке куәлігін ала алмай жүрген тұрғындарды құжаттандырды.
Мәлім болғандай, өңірдегі 30 азамат 1974-ші жылғы үлгідегі төлқұжатпен жүрген. Сондықтан, шұғыл түрде екі азаматтан жеке куәлік алуға керекті құжаттар қабылданды. Қалған азаматтарға көші-қон қызметінде жеке куәлікті рәсімдеу жолдары түсіндіріліп, өтініш үлгісі таратылып берілді.
«Азаматтардың Кеңес дәуірінен жеткен төлқұжаттарын жеке куәлікке алмастырмауының себебі, ауылдардың аудан орталығынан тым шалғайда орналасқандығынан», – дейді прокурорлар.
Бұл шара облысымыздың барлық өңірлерінде жалғасатын болады.
Қарағанды облысының прокуратурасының баспасөз қызметі.